യു.ഡി.എഫ്. നേടിയ മികച്ച വിജയം കൂട്ടായ പരിശ്രമത്തിന്റെ ഫലമാണെന്ന് കെ.പി.സി.സി.അധ്യക്ഷൻ സണ്ണി ജോസഫ് പറഞ്ഞു. കോണ്ഗ്രസ് പാർട്ടിക്കും ഐക്യജനാധിപത്യ മുന്നണിക്കും ശക്തമായ പിന്തുണ നല്കിയ എല്ലാ നേതാക്കന്മാർക്കും പ്രവർത്തകർക്കും ജനങ്ങള്ക്കും അദ്ദേഹം നന്ദി അറിയിച്ചു. കോണ്ഗ്രസ് പാർട്ടിയും മുന്നണിയിലെ മറ്റ് കക്ഷികളും ഒറ്റക്കെട്ടായാണ് തിരഞ്ഞെടുപ്പില് പ്രവർത്തിച്ചത്. എല്ലാവരും ഒന്നിച്ചിറങ്ങി മികച്ച പ്രകടനം കാഴ്ചവെച്ചു.പ്രതീക്ഷിച്ചതിലും വലിയ ജനപിന്തുണയാണ് കോണ്ഗ്രസിന് ലഭിച്ചത്. "പ്രതീക്ഷിച്ചതിനേക്കാള് വലിയ വിജയമാണ് ഉണ്ടായിരിക്കുന്നത്," അദ്ദേഹം പറഞ്ഞു.വിജയത്തില് സഹകരിച്ച ജനങ്ങളോടും മാധ്യമങ്ങളോടും സണ്ണി ജോസഫ് പ്രത്യേകം നന്ദി അറിയിച്ചു.
എല്.ഡി.എഫ്. സർക്കാരിന്റെ ജനദ്രോഹ നയങ്ങള്ക്കെതിരായ ശക്തമായ തിരിച്ചടിയാണ് ഈ തദ്ദേശ തിരഞ്ഞെടുപ്പ് ഫലമെന്ന് സണ്ണി ജോസഫ് വിലയിരുത്തി. എല്.ഡി.എഫ്. സർക്കാരിന്റെ വീഴ്ചകള് യു.ഡി.എഫ്. നേരത്തെ തന്നെ ജനങ്ങള്ക്കിടയില് തുറന്നുകാട്ടിയിരുന്നു. കോണ്ഗ്രസിനെ ജനങ്ങള് ശരിയായി മനസ്സിലാക്കി, അതിന്റെ പ്രതിഫലനമാണ് ഈ മികച്ച വിജയം.ഈ തദ്ദേശ തിരഞ്ഞെടുപ്പ് നിയമസഭാ തിരഞ്ഞെടുപ്പിന്റെ 'സെമിഫൈനലാണ്' എന്ന് അദ്ദേഹം പ്രസ്താവിച്ചു.
തദ്ദേശ തിരഞ്ഞെടുപ്പിലെ ഈ മുന്നേറ്റം നിയമസഭാ തിരഞ്ഞെടുപ്പില് യു.ഡി.എഫിന് വലിയ വിജയം ഉറപ്പിക്കാനുള്ള ഊർജ്ജം നല്കുമെന്നും അദ്ദേഹം കൂട്ടിച്ചേർത്തു.നിയമസഭാ തിരഞ്ഞെടുപ്പിനുള്ള മുന്നൊരുക്കങ്ങള് ഇതോടെ കൂടുതല് ഊർജ്ജിതമാക്കുമെന്നും അദ്ദേഹം സൂചന നല്കി.