നടന് ടിനി ടോമിനെതിരെ കേസ് എടുക്കാന് നിര്ദേശിച്ച കോടതി നിര്ദേശത്തിന് പിന്നാലെ പ്രതികരണവുമായി നടി അൻസിബ.സോഷ്യല് മീഡിയയിലൂടെയാണ് നടിയുടെ പ്രതികരണം. 'സത്യമേവ ജയതേ' എന്നാണ് അന്സിബ തന്റെ സോഷ്യല് മീഡിയ അക്കൗണ്ടുകളില് കുറിച്ചിരിക്കുന്നത്. ഒപ്പം കേരള ഹൈക്കോടതിയുടെ ചിത്രവും അൻസിബ പങ്കുവച്ചിട്ടുണ്ട്. വർഗീയ പരാമർശത്തില് ടിനി ടോമിനെതിരെ കേസെടുക്കാനാണ് എറണാകുളം ജില്ല സെഷൻസ് കോടതി ഇന്നലെ നിർദേശം നല്കിയത്. സ്ത്രീത്വത്തെ അപമാനിക്കല് അടക്കമുള്ള പരാതികള് എല്ലാം അന്വേഷിക്കണമെന്നും കോടതി നിർദേശത്തിലുണ്ട്.അൻസിബയുടെ പരാതിയില് കേസ് എടുക്കാൻ തെളിവ് ഇല്ലെന്നായിരുന്നു കടവന്ത്ര പൊലീസിൻ്റെ നിലപാട്. കേസ് എടുക്കാനാവില്ലെന്ന പൊലീസ് റിപ്പോർട്ട് അപൂർണമാണെന്നും കോടതി ഉത്തരവിലുണ്ട്. അന്സിബയ്ക്ക് എതിരായ ജിഹാദി പരാമർശം തമാശയ്ക്ക് വിളിച്ചത് എന്ന പൊലീസ് റിപ്പോർട്ട് കോടതി തള്ളി. ടിനി ടോമിനെതിരെ പ്രഥമദൃഷ്ട്യാ തെളിവുണ്ടെന്നും നീന കുറുപ്പിന്റെ സാക്ഷിമൊഴികളിലും ഇക്കാര്യമുണ്ടെന്നും കോടതി ഉത്തരവില് ഉണ്ട്. അമ്മ എക്സിക്യൂട്ടീവ് കമ്മിറ്റി അംഗം കൂടിയായിരുന്ന നടി നീന കുറുപ്പിന്റെ മൊഴിയാണ് കേസില് നിര്ണായകമായത്.
