എല്ലാ പരീക്ഷാകേന്ദ്രങ്ങളിലും ആവശ്യമായ പൊലീസ് സംവിധാനം മെയ് രണ്ട് മുതല് മൂന്ന് വരെ ഉറപ്പുവരുത്തുന്നതിനുള്ള നടപടികള് സ്വീകരിച്ചിരുന്നു. ചോദ്യപേപ്പറുകള് അടങ്ങിയ ട്രങ്കുകള്ക്കും പരീക്ഷയ്ക്ക് ശേഷമുള്ള ഉത്തരക്കടലാസുകള് ഉള്പ്പെടെയുള്ള ട്രങ്കുകള്ക്കും പരീക്ഷാകേന്ദ്ര സൂപ്രണ്ടുമാർ ആവശ്യപ്പെടുന്ന പൊലീസ് സേവനം അനുവദിച്ചു നല്കാൻ തീരുമാനിച്ചു. എല്ലാ പരീക്ഷാകേന്ദ്രങ്ങളിലും തടസ്സം കൂടാതെ വൈദ്യുതി ലഭ്യമാക്കുന്നതിനുള്ള സംവിധാനങ്ങള് പരീക്ഷയുടെ തലേദിവസം മുതല് ഉറപ്പുവരുത്താൻ കെ.എസ്.ഇ.ബിക്ക് നിർദ്ദേശം നല്കി.
രാവിലെ പരീക്ഷാകേന്ദ്രങ്ങളില് എത്തുന്നതിനും പരീക്ഷ കഴിഞ്ഞ് വൈകിട്ട് തിരികെ പോകുന്നതിനും ആവശ്യമായ പൊതുഗതാഗത സംവിധാനങ്ങള് കെ.എസ്.ആർ.ടി.സി പ്രധാന ഡിപ്പോകളില് നിന്ന് ഉറപ്പുവരുത്തും. നാഷണല് ടെസ്റ്റിംഗ് ഏജൻസിയുടെ പ്രോട്ടോക്കോള് പ്രകാരമുള്ള നടപടികള് എല്ലാ സെന്ററുകളിലും സ്വീകരിച്ചിട്ടുണ്ടെന്ന് കോർഡിനേറ്റർമാരും പരീക്ഷാകേന്ദ്ര സൂപ്രണ്ടുമാരും ഉറപ്പുവരുത്തണം. കൂടാതെ എല്ലാ സെന്ററുകളിലും കുടിവെള്ള ലഭ്യതയും ഉറപ്പാക്കും.