തിരുവനന്തപുരം: തിരുവനന്തപുരം ജില്ലാ കോൺഗ്രസ് പ്രസിഡന്റ് പദവിയിൽ നിന്നും മുതിർന്ന നേതാവ് എൻ ശക്തൻ രാജിവെച്ചു. രാജിക്കത്ത് കെപിസിസി പ്രസിഡന്റ് സണ്ണി ജോസഫിന് കൈമാറി. ഡിസിസി അധ്യക്ഷ സ്ഥാനത്ത് തുടരാൻ താൽപ്പര്യമില്ലെന്ന് ചൂണ്ടിക്കാട്ടിയാണ് രാജി. അതേസമയം കെപിസിസി രാജി അംഗീകരിച്ചിട്ടില്ലെന്നാണ് സൂചന.
ശബ്ദരേഖ വിവാദത്തെത്തുടർന്ന് പാലോട് രവി രാജിവെച്ചതിനെത്തുടർന്നാണ് മുതിർന്ന നേതാവായ എൻ ശക്തനെ താൽക്കാലിക ഡിസിസി അധ്യക്ഷനായി നിയമിച്ചത്. ഉടൻ തന്നെ സ്ഥിരം ഡിസിസി അധ്യക്ഷനെ നിയമിക്കുമെന്നും, അതുവരെ ഡിസിസി പ്രസിഡന്റിന്റെ ചുമതല വഹിക്കാനുമാണ് കെപിസിസി നേതൃത്വം ശക്തനോട് ആവശ്യപ്പെട്ടിരുന്നത്.
സ്ഥിരം അധ്യക്ഷനെ കണ്ടെത്താനായി പലവിധത്തിലുള്ള ചർച്ചകൾ പാർട്ടിയിൽ നടന്നിരുന്നു. എന്നാൽ ഡിസിസി അധ്യക്ഷന്റെ കാര്യത്തിൽ ഇതുവരെ തീരുമാനമായില്ല. നേരത്തെ പലതവണ സ്ഥാനം ഒഴിയാനുള്ള താൽപ്പര്യം ശക്തൻ പാർട്ടി നേതൃത്വത്തെ അറിയിച്ചിരുന്നതായും റിപ്പോർട്ടുണ്ട്. അതേസമയം, തദ്ദേശ തെരഞ്ഞെടുപ്പ് കഴിയുന്നതുവരെ ഡിസിസി അധ്യക്ഷസ്ഥാനത്തു തുടരാൻ കെപിസിസി നേതൃത്വം ശക്തനോട് ആവശ്യപ്പെടുമെന്നാണ് സൂചന.