തിരുവനന്തപുരം: ലൈംഗിക പീഡന പരാതിയിൽ കേസെടുത്തതിന് പിന്നാലെ മുൻകൂർ ജാമ്യഹർജി നൽകി പാലക്കാട് എംഎൽഎ രാഹുൽ മാങ്കൂട്ടത്തിൽ. കേസിൽ താൻ നിരപരാധിയെന്നാണ് ജാമ്യഹർജിയിലെ രാഹുലിന്റെ വാദം. യുവതിയെ ബലാത്സംഗം ചെയ്തിട്ടില്ല, ഗർഭഛിദ്രത്തിന് നിർബന്ധിച്ചിട്ടില്ലെന്നും രാഹുൽ അവകാശപ്പെടുന്നു. തിരുവനന്തപുരം ജില്ലാ സെഷൻസ് കോടതിയിലാണ് ജാമ്യഹർജി നൽകിയത്.
പരാതി നൽകിയ യുവതിയുമായി ദീർഘകാലമായി സൗഹൃദമുണ്ടെന്ന് രാഹുൽ ഹർജിയിൽ പറയുന്നു. യുവതിയുടെ ആരോപണങ്ങൾ കെട്ടിച്ചമച്ചതാണ്, ഇതിന് പിന്നിൽ രാഷ്ടീയ ലക്ഷ്യങ്ങളുണ്ട്. മുഖ്യമന്ത്രിക്ക് നേരിട്ട പരാതി നൽകിയതിലും ഇത്തരം നീക്കങ്ങൾ സംശയിക്കുന്നു. തനിക്കെതിരെ പൊലീസ് നടത്തുന്ന അതിവേഗ നീക്കത്തിന് പിന്നിൽ രാഷ്ട്രീയ നീക്കമുണ്ടെന്നും രാഹുൽ പറയുന്നു. പരാതി ഉന്നയിച്ച യുവതിയുടെ ഭർത്താവ് ബിജെപി പ്രവർത്തകനാണ്. പരാതിക്ക് പിന്നിൽ ബിജെപി - സിപിഎം ബന്ധമാണ്. പ്രതിപക്ഷത്തെ യുവ നേതാവ് എന്ന നിലയിലാണ് തന്നെ ലക്ഷ്യമിട്ടുകൊണ്ടുള്ള ആരോപണങ്ങൾ എന്നും രാഹുൽ ഹർജിയിൽ ആരോപിക്കുന്നു. രാഹുൽ മാങ്കൂട്ടത്തിലിന്റെ ഹർജി ഇന്ന് കോടതി പരിഗണിച്ചേക്കില്ലെന്നാണ് റിപ്പോർട്ടുകൾ.
രാഹുൽ മാങ്കൂട്ടത്തിലിനെതിരെ ജാമ്യമില്ലാ വകുപ്പുകൾ ചുമത്തിയാണ് ലൈംഗിക പീഡന പരാതിയിൽ പൊലീസ് കേസെടുത്തിരിക്കുന്നത്. ജീവപര്യന്തം വരെ ലഭിക്കാവുന്ന കടുത്ത വകുപ്പുകൾ രാഹുലിനെതിരെ ചുമത്തിയിട്ടുണ്ട്. ബിഎൻഎസ് 64- എഫ് ( അധികാരസ്ഥാനം ഉപയോഗിച്ച് ബലാത്സംഗം), ബിഎൻഎസ് 64- എം ( തുടർച്ചയായ ബലാത്സംഗം ), ബിഎൻഎസ് 64- എച്ച് ( ഗർഭിണിയാണെന്ന് അറിഞ്ഞിട്ടും ബലാത്സംഗം), ബിഎൻഎസ് 89 ( നിർബന്ധിത ഭ്രൂണഹത്യ ) തുടങ്ങിയ വകുപ്പുകൾ പ്രകാരമാണ് കേസെടുത്തിരിക്കുന്നത്.
2024 മാർച്ച് നാലിന് പരാതിക്കാരിയുടെ ഫ്ലാറ്റിൽ വെച്ച് നിർബന്ധിച്ച് ലൈംഗിക ബന്ധത്തിൽ ഏർപ്പെടുകയും, ദേഹോപദ്രവം എൽപ്പിക്കുകയും ചെയ്തുവെന്നുൾപ്പെടെയാണ് യുവതിയുടെ പരാതി. 2025 ഏപ്രിലിൽ തിരുവനന്തപുരം തൃക്കണ്ണാപുരത്തെ ഫ്ലാറ്റിൽ വെച്ച് ബലാത്സംഗം ചെയ്തു. 2025 മെയ് മാസം അവസാനം രണ്ടു തവണ പാലക്കാട്ടെ ഫ്ലാറ്റിൽ വെച്ചും ബലാത്സംഗം ചെയ്തുവെന്നും യുവതി മൊഴിയിൽ വ്യക്തമാക്കിയിട്ടുണ്ട്.