മൂന്നാംക്ലാസുകാരൻ ഉത്തര കടലാസിലെ നിയമാവലി ജീവിതത്തിലെ മികച്ച സന്ദേശമെന്ന് ചൂണ്ടിക്കാണിച്ച് വിദ്യാഭ്യാസ മന്ത്രി ശിവൻകുട്ടി. പരീക്ഷ ചോദ്യ പേപ്പറിലെ ചോദ്യത്തിന് മൂന്നാം ക്ലാസുകാരൻ അഹാൻ അനൂപ് നൽകിയ ഉത്തരത്തിൽ കുട്ടിയെ അഭിനന്ദിച്ചുകൊണ്ട് മന്ത്രി ഫെയ്ബുക്കിൽ ഉത്തര കടലാസും പങ്കുവെച്ചു.
മലയാളം പരീക്ഷയിൽ ഇഷ്ടപ്പെട്ട കളിക്ക് നിയമാവലി ഉണ്ടാക്കുക എന്നതായിരുന്നു ചോദ്യം. മാതൃക ഉത്തരം അടക്കം കാണിച്ചിരുന്ന ചോദ്യത്തിന് 'നാരങ്ങയും സ്പൂണും' എന്ന കളിയും നിയമാവലിയുമായിരുന്നു അഹാന്റെ ഉത്തരം.
ആറ് നിയമങ്ങളാണ് ഉത്തരത്തിൽ ഉണ്ടായിരുന്നത്. ആറാമത്തെ നിയമവും ആ ഉത്തരക്കടലാസും ഇപ്പോൾ സമൂഹമാധ്യമത്തിൽ വൈറലാണ്. ജയിച്ചവർ തോറ്റവരെ കളിയാക്കരുത് എന്നതാണ് അഹാൻ അവസാന നിയമമായി എഴുതിയത്.
അഹാന്റെ അമ്മയും മാധ്യമപ്രവർത്തകയുമായ നിമ്യ നാരായണനാണ് ഉത്തരക്കടലാസ് ആദ്യം സമൂഹമാധ്യമത്തിൽ പങ്കുവെച്ചത്. പിന്നാലെയാണ് വിദ്യാഭ്യാസ മന്ത്രി ശിവൻകുട്ടിയും അഹാന് അഭിനന്ദനവുമായെത്തിയത്. ഉത്തരക്കടലാസ് അടക്കം പങ്കുവെച്ചായിരുന്നു മന്ത്രിയുടെ കുറിപ്പ്.
അഹാന്റെ ഇത്തരം
നാരങ്ങയും സ്പൂണും
ഒരു സമയം അഞ്ച് പേർക്ക് മത്സരിക്കാം. എല്ലാവരും വായിൽ സ്പൂൺ വെക്കുക.
നാരങ്ങ സ്പൂണിൻ മേൽ വെക്കണം.
അടയാളപ്പെടുത്തിയിരിക്കുന്ന വരിയിൽ നിന്നാണ് കളിക്കേണ്ടത്.
നിലത്ത് വീണാൽ പിന്നെയും എടുത്തുവെച്ചു വേണം നടക്കേണ്ടത്
വരി തെറ്റിയാൽ കളിയിൽ നിന്ന് പുറത്താകും
ജയിച്ചവർ തോറ്റവരെ കളിയാക്കരുത്..
മന്ത്രിയുടെ പോസ്റ്റ്
'ജയിച്ചവർ തോറ്റവരെ കളിയാക്കരുത്.. ' ജീവിതത്തിലെ മികച്ച സന്ദേശം ഉത്തരക്കടലാസ്സിൽ പകർത്തിയ മൂന്നാം ക്ലാസ്സുകാരന് അഭിവാദ്യങ്ങൾ..
അഹാൻ അനൂപ്, തലശ്ശേരി ഒ ചന്തുമേനോൻ സ്മാരക വലിയമാടാവിൽ ഗവ. യു പി സ്കൂൾ
നമ്മുടെ പൊതുവിദ്യാലയങ്ങൾ ഇങ്ങിനെയൊക്കെയാണ് മുന്നേറുന്നത്