കണ്ണൂർ: ടിപി ചന്ദ്രശേഖരൻ വധക്കേസ് പ്രതി കൊടി സുനിയുടെ പരോൾ റദ്ദാക്കി. കൊടി സുനി പരോൾ വ്യവസ്ഥ ലംഘിച്ചുവെന്ന മീനങ്ങാടി സ്‌റ്റേഷൻ സിഐയുടെ റിപ്പോർട്ടിന്റെ അടിസ്ഥാനത്തിലാണ് നടപടി. സ്റ്റേഷനിൽ റിപ്പോർട്ട് ചെയ്യണമെന്ന വ്യവസ്ഥ പാലിച്ചില്ലെന്നും റിപ്പോർട്ടിൽ ചൂണ്ടിക്കാട്ടിയിരുന്നു. ജൂലൈ 21 നാണ് കൊടി സുനിക്ക് 15 ദിവസത്തെ പരോൾ അനുവദിച്ചത്.
പരോൾ വ്യവസ്ഥ പ്രകാരം കണ്ണൂർ, കോഴിക്കോട് ജില്ലകളിൽ കൊടി സുനിക്ക് പ്രവേശനാനുമതി ഉണ്ടായിരുന്നില്ല. വിചാരണ നടപടികൾക്ക് മാത്രം തലശ്ശേരി കോടതിയിൽ വരാനുള്ള അനുമതി മാത്രമാണ് നൽകിയിരുന്നത്. ഇതിന്റെ അടിസ്ഥാനത്തിൽ കൊടിസുനി വയനാട്ടിലേക്ക് പോയെന്നും, മീനങ്ങാടിയിൽ താമസിക്കുന്നുവെന്നുമാണ് അറിയിച്ചിരുന്നത്. തുടർന്ന് പൊലീസ് നടത്തിയ അന്വേഷണത്തിൽ മീനങ്ങാടിയിൽ കൊടിസുനി ഇല്ലെന്ന് കണ്ടെത്തിയിരുന്നു.
കൊടി സുനി സംസ്ഥാനത്തിന് പുറത്താണ് ഉണ്ടായിരുന്നതെന്ന് സ്‌പെഷൽ ബ്രാഞ്ചും റിപ്പോർട്ട് നൽകിയിരുന്നു. ഇതിന്റെ അടിസ്ഥാനത്തിലാണ് പരോൾ റദ്ദാക്കിയത്. കൊടി സുനിയെ തിരികെ കണ്ണൂർ സെൻട്രൽ ജയിലിൽ എത്തിച്ചതായാണ് റിപ്പോർട്ട്. അമ്മയുടെ അസുഖം, വീട്ടിലെ അത്യാവശ്യ കാര്യങ്ങൾ തുടങ്ങിയവ ചൂണ്ടിക്കാട്ടി നൽകിയ അപേക്ഷയിലാണ് കൊടി സുനിക്ക് 15 ദിവസത്തെ അടിയന്തര പരോൾ അനുവദിച്ചിരുന്നത്.