വെളിച്ചെണ്ണ വില കുത്തനെ കൂടിയതോടെ വിപണിയിൽ വ്യാജനും കളം പിടിച്ചു കഴിഞ്ഞു. ഒറിജിനൽ എന്ന് കരുതി വാങ്ങുന്ന എണ്ണ പലപ്പോഴും ഒറിജിനലിനെ വെല്ലുന്ന ഡ്യുപ്ലിക്കേറ്റ് ആയിരിക്കും. പാചകത്തിന് ഉപയോഗിക്കുന്നതു കൊണ്ട് തന്നെ മായമുള്ള വെളിച്ചെണ്ണ പലതരത്തിലുള്ള ആരോഗ്യ സങ്കീർണതകളിലേക്ക് നയിക്കാം.
വെള്ളിച്ചെണ്ണയിലെ വ്യാജനെ വീട്ടിൽ വെച്ച് തന്നെ എങ്ങനെ കണ്ടെത്താം എന്നതിനെക്കുറിച്ച് ഭക്ഷ്യസുരക്ഷാ-മാനദണ്ഡ അതോറിറ്റി ഓഫ് ഇന്ത്യ ചില മാർഗ്ഗങ്ങൾ നിർദ്ദേശിക്കുന്നുണ്ട്.
ഫ്രിഡ്ജ് ടെസ്റ്റ്
ഒരു ചില്ലു പാത്രത്തിൽ അര മണിക്കൂർ അൽപം വെളിച്ചെണ്ണ ഫ്രിഡ്ജിൽ സൂക്ഷിക്കുക. ശുദ്ധമായ വെളിച്ചെണ്ണയാണെങ്കിൽ അത് പൂർണ്ണമായും വെളുത്ത നിറത്തിൽ ഉറച്ചിട്ടുണ്ടാകും. മായം കലർന്നതാണെങ്കിൽ, മായം കലർത്തിയ ഭാഗം വെളിച്ചെണ്ണയ്ക്ക് മുകളിലോ താഴെയോ വേറിട്ടൊരു പാളിയായി കാണാം.
ചൂടാക്കി നോക്കാം
ശുദ്ധമായ വെളിച്ചെണ്ണ ചെറിയ തീയിൽ ചൂടാക്കുമ്പോൾ നല്ല മണം ഉണ്ടാകും. മായം ചേർത്തതാണെങ്കിൽ, ചൂടാക്കുമ്പോൾ അസ്വാഭാവികമായ മണമുണ്ടാകാം.
വെള്ളത്തിൽ ലയിപ്പിക്കുക
ഒരു ഗ്ലാസ്സിൽ വെള്ളമെടുത്ത് അതിലേക്ക് ഒരു സ്പൂൺ വെളിച്ചെണ്ണ ഒഴിക്കുക. ശുദ്ധമായ വെളിച്ചെണ്ണ വെള്ളത്തിൽ ലയിക്കില്ല, അത് മുകളിൽ പാളിയായി നിൽക്കും. മായം ചേർത്ത എണ്ണയാണെങ്കിൽ, അത് വെള്ളത്തിൽ ലയിക്കുന്നതായി കാണാം.
ചർമത്തിൽ പുരട്ടി നോക്കാം
ശുദ്ധമായ വെളിച്ചെണ്ണ കയ്യിൽ പുരട്ടുമ്പോഴേ പെട്ടെന്ന് ആഗിരണം ചെയ്യപ്പെടുകയും ചർമ്മം മൃദുവായി അനുഭവപ്പെടുകയും ചെയ്യും. മായം ചേർത്തതാണെങ്കിൽ, എണ്ണ ചർമത്തിൽ വേഗത്തിൽ ആഗിരണം ചെയ്യപ്പെടാതെ നിൽക്കുകയും ഒട്ടിപ്പിടിക്കുന്നതായി അനുഭവപ്പെടുകയും ചെയ്യും.
ഇത്തരം ലളിതമായ ട്രിക്കുകൾ ഉപയോഗിച്ച് വീട്ടിൽ തന്നെ വെളിച്ചെണ്ണയുടെ ഗുണനിലവാരം ഉറപ്പാക്കാനാകും. എന്നാൽ കൃത്യമായ ഫലം ലഭിക്കാൻ വിദഗ്ദ്ധ പരിശോധന ആവശ്യമാണ്. വെളിച്ചെണ്ണ വാങ്ങുമ്പോൾ FSSAI യുടെ മുദ്ര ഉറപ്പ് വരുത്തുന്നതും പ്രധാനമാണ്.