കടലില്‍ തിരയില്‍പ്പെട്ട മാതാവിനെ രക്ഷിക്കാൻ ശ്രമിക്കുന്നതിനിടെ 14കാരൻ മുങ്ങി മരിച്ചു. പള്ളുരുത്തി എസ്ഡിപിവൈ റോഡില്‍ ചിത്തുപറമ്ബില്‍ ഹർഷാദിന്റെ മകൻ ഷാഹിദാണ്(14) മരിച്ചത്.
കഴിഞ്ഞ ഞായറാഴ്ച വൈകിട്ട് 6 മണിയോടെ കണ്ണമാലി പുത്തൻതോട് ബീച്ചില്‍ കുടുംബത്തോടൊപ്പം കുളിക്കാനിറങ്ങിയതായിരുന്നു ഷാഹിദ്. ഇതിനിടെ ഷാഹിദിന്റെ അമ്മ ഷാഹിന തിരയില്‍പ്പെട്ടു. ഇവരെ രക്ഷിക്കാൻ ശ്രമിക്കുന്നതിനിടെയാണ് ഷാഹിദിനെ കാണാതായത്. കോസ്റ്റല്‍ പോലീസും മത്സ്യത്തൊഴിലാളികളും ചേർന്ന് ഷാഹിനയെ രക്ഷപ്പെടുത്തിയെങ്കിലും മകനെ കണ്ടെത്താനായില്ല. തുടർന്ന് നാട്ടുകാരും അഗ്നി രക്ഷാസേനയും മുങ്ങല്‍ വിദഗ്ധരും ചേർന്ന് കടലില്‍ തിരച്ചില്‍ നടത്തിയെങ്കിലും ഷാഹിദിനെ കണ്ടെത്താൻ കഴിഞ്ഞിരുന്നില്ല. ഇന്നലെ രാവിലെ മത്സ്യത്തൊഴിലാളികള്‍ നടത്തിയ തിരച്ചിലിലാണ് മൃതദേഹം കണ്ടെത്തിയത്. കബറടക്കം നടത്തി.