സാമൂഹ്യ സുരക്ഷാ പെന്ഷന് അനധികൃതമായി കൈപ്പറ്റിയ സര്ക്കാര് ഉദ്യോഗസ്ഥര്ക്ക് ധനവകുപ്പ് ഉടന് നോട്ടീസ് നല്കും.
സാങ്കേതിക പിഴവ് മൂലമാണോ അതോ ബോധപൂര്വം അപേക്ഷിച്ചതുകൊണ്ടാണോ പെന്ഷന് ലഭ്യമായതെന്ന് പരിശോധിക്കും. ഇതിന് ശേഷം കര്ശന നടപടിയിലേക്ക് കടക്കുമെന്നാണ് സര്ക്കാര് അറിയിക്കുന്നത്. മുഴുവന് പട്ടികയും കണ്ടാല് ഞെട്ടുമെന്ന് ധനമന്ത്രി പറഞ്ഞെങ്കിലും ഉദ്യോഗസ്ഥരുടെ പേരുവിവരങ്ങള് ഇനിയും പുറത്തുവിട്ടിട്ടില്ല. മസ്റ്ററിങ് ഉള്പ്പടെ കര്ശനമാക്കിയിട്ടും ക്ഷേമ പെന്ഷന് അനര്ഹരില് എത്തിയത് സര്ക്കാരിനും നാണക്കേടാണ്. പെന്ഷന് അര്ഹരാണെന്ന് സാക്ഷ്യപ്പെടുത്തിയ തദ്ദേശ സ്ഥാപനങ്ങളിലെ ഉദ്യോഗസ്ഥര്ക്കെതിരെയും നടപടി ഉണ്ടാകും.
ഗസറ്റഡ് ഉദ്യോഗസ്ഥർ അടക്കമാണ് പെൻഷൻ കൈപ്പറ്റുന്നത്. കോളേജ് അസിസ്റ്റന്റ് പ്രൊഫസർമാർ, ഹയർ സെക്കണ്ടറിയിലെ അധ്യാപകരും ഉള്പ്പെടെ ക്ഷേമ പെൻഷൻ വാങ്ങുന്നവരുടെ പട്ടികയിലുണ്ടായിരുന്നു. അനധികൃതമായി കൈപ്പറ്റിയ പെൻഷൻ തുക പലിശ അടക്കം തിരിച്ചു പിടിക്കാനാണ് ധനവകുപ്പിന്റെ നിർദേശം. കുറ്റക്കാർക്കെതിരെ കർശന അച്ചടക്ക നടപടി സ്വീകരിക്കാൻ ധനമന്ത്രി കെ എൻ ബാലഗോപാല് നിർദേശിച്ചു.