മഹാരാജാസ് കോളേജില്‍ ഉന്നതവിദ്യാഭ്യാസ മന്ത്രി റോജി എം.ജോണിനെതിരെ എസ്‌എഫ്‌ഐ പ്രതിഷേധം. കാലടി സർവകലാശാലയിലെ 16 വിദ്യാർത്ഥികളെ സസ്പെൻഡ് ചെയ്തതില്‍ പ്രതിഷേധിച്ചാണ് വിദ്യാർത്ഥികള്‍ രംഗത്തെത്തിയത്.
മഹാരാജാസ് കോളേജില്‍ നടന്ന ബിരുദദാന ചടങ്ങില്‍ മന്ത്രി പ്രസംഗിക്കുന്നതിനിടെയാണ് പ്രവർത്തകർ ബാനറുകളും പ്ലക്കാർഡുകളുമായി വേദിയിലെത്തിയത്. വിദ്യാർത്ഥികള്‍ സ്റ്റേജില്‍ മന്ത്രിയെ വളഞ്ഞ് പ്രതിഷേധിക്കുകയായിരുന്നു. തുടർന്ന് മന്ത്രി പരിപാടിയില്‍ നിന്ന് ഇറങ്ങിപ്പോയി.
എന്നാല്‍, പ്രതിഷേധം സമാധാനപരമായിരുന്നുവെന്നാണ് എസ്‌എഫ്‌ഐ എറണാകുളം ജില്ലാ സെക്രട്ടറിയുടെ വിശദീകരണം. ബിരുദദാന ചടങ്ങ് തടസപ്പെടുത്തുകയോ മന്ത്രിയെ ആക്രമിക്കുകയോ ചെയ്യുകയായിരുന്നില്ല ലക്ഷ്യമെന്നും വിദ്യാർത്ഥികളുടെ ചോദ്യങ്ങള്‍ക്ക് മറുപടി തേടുക മാത്രമാണ് ചെയ്തതെന്നും അദ്ദേഹം പറഞ്ഞു.
കാലടി സർവകലാശാലയിലെ വിദ്യാർത്ഥികള്‍ അടിസ്ഥാന സൗകര്യങ്ങള്‍ ആവശ്യപ്പെട്ട് നടത്തിയ സമരത്തിനിടെ അവതരിപ്പിച്ച നാടകത്തെ അക്രമസമരമായി ചിത്രീകരിച്ച്‌ വിദ്യാർത്ഥികളെ സസ്പെൻഡ് ചെയ്തെന്നാണ് എസ്‌എഫ്‌ഐ ആരോപിക്കുന്നത്. ലൈറ്റുകള്‍ തകരാറിലായതില്‍ പ്രതിഷേധിച്ച്‌ നടത്തിയ നാടകത്തെ ശവമഞ്ചം ഒരുക്കിയുള്ള പ്രതിഷേധമായാണ് മന്ത്രി ഉള്‍പ്പെടെയുള്ളവർ വിശേഷിപ്പിച്ചതെന്നും വിദ്യാർത്ഥികള്‍ ആരോപിച്ചു. സംഭവത്തില്‍ വിദ്യാർത്ഥികളെ സസ്പെൻഡ് ചെയ്തിട്ട് 60 ദിവസം പിന്നിട്ടെന്നാണ് ആരോപണം.