കുടുംബവഴക്കിനെ തുടർന്നുണ്ടായ ആവേശത്തിലും ദേഷ്യത്തിലും വാതിലിന്റെ ചില്ല് തകർത്ത യുവാവിന് ദാരുണാന്ത്യം.
ഗ്ലാസ് കഷണങ്ങള് കൊണ്ട് കൈയിലെ ഞരമ്പ് മുറിഞ്ഞ് അമിതമായി രക്തം വാർന്നതിനെ തുടർന്നാണ് മഞ്ഞുമ്മല് ചാലനാട്ടുവീട്ടില് പ്രവീണ് (49) മരണപ്പെട്ടത്. ചൊവ്വാഴ്ച രാത്രി പത്തരയോടെയായിരുന്നു നാടിനെ നടുക്കിയ ഈ സംഭവം.
വീട്ടിലുണ്ടായ തർക്കത്തെ തുടർന്ന് രോഷാകുലനായ പ്രവീണ് അടുക്കള വാതിലിന്റെ ചില്ലുപാളി ആഞ്ഞടിക്കുകയും തകർക്കുകയുമായിരുന്നു. ഇതിനിടയില് ചില്ലു കഷണങ്ങള് ആഴത്തില് തറച്ചുകയറി കൈയ്യിലെ പ്രധാന രക്തധമനി മുറിഞ്ഞു. കൈയില് നിന്ന് രക്തം ഒഴുകുന്നത് കണ്ട പ്രവീണ് പരിഭ്രാന്തനായി കുളിമുറിയില് കയറി വാതിലടയ്ക്കുകയായിരുന്നു.
ഏറെ സമയം കഴിഞ്ഞിട്ടും കുളിമുറിയില് നിന്ന് പ്രവീണ് പുറത്തുവരാതിരുന്നതോടെ പ്രവീണിന്റെ ഭാര്യ ഷിംന സഹോദരനെ വിവരമറിയിച്ചു. തുടർന്ന് ബന്ധുക്കളെത്തി ഏലൂർ പൊലീസില് വിവരം ധരിപ്പിക്കുകയായിരുന്നു. സ്ഥലത്തെത്തിയ പോലീസ് ഉടൻ തന്നെ കുളിമുറിയുടെ വാതില് തുറന്ന് രക്തത്തില് കുളിച്ചുകിടന്ന പ്രവീണിനെ എറണാകുളം മെഡിക്കല് കോളേജ് ആശുപത്രിയില് എത്തിച്ചെങ്കിലും ജീവൻ രക്ഷിക്കാനായില്ല. ബുധനാഴ്ച പുലർച്ചെ 3.30-ഓടെ പ്രവീണ് മരണത്തിന് കീഴടങ്ങുകയായിരുന്നു.
പെട്ടെന്നുണ്ടായ കോപത്തില് എടുത്തുചാടി ചെയ്ത പ്രവൃത്തിയാണ് ഒരു കുടുംബത്തിന്റെ മുഴുവൻ തണലായിരുന്ന വീട്ടുകാരന്റെ ജീവനെടുത്തത്. ഇൻക്വസ്റ്റ് നടപടികള്ക്കും പോസ്റ്റ്മോർട്ടത്തിനും ശേഷം മൃതദേഹം ബന്ധുക്കള്ക്ക് വിട്ടുനല്കി. ഭാര്യ: ഷിംന. മക്കള്: ആൻഡ്രിയ, അജോയ്. സംഭവത്തില് ഏലൂർ പോലീസ് കേസെടുത്ത് മേല്നടപടികള് സ്വീകരിച്ചുവരുന്നു.