വിവിധയിനം പൂക്കളും വർണ്ണക്കാഴ്ചകളും
ഓണപ്പൂക്കളത്തിന് മാറ്റ് കൂട്ടാനായി വിവിധയിനം പൂക്കളാണ് ഇത്തവണയും കേരളത്തിലെ വിപണികളിലേക്ക് എത്തുന്നത്. പ്രധാനമായും ചെണ്ടുമല്ലി (ഓറഞ്ച്, മഞ്ഞ നിറങ്ങള്), വാടാമല്ലി, അരളിപ്പൂക്കള് (പിങ്ക്, ചുവപ്പ്, വെള്ള) എന്നിവയാണ് വിപണിയില് സജീവമായിട്ടുള്ളത്. ഇതിനുപുറമെ വെള്ള, മഞ്ഞ നിറങ്ങളിലുള്ള ജമന്തിപ്പൂക്കള്, വയലറ്റ് നിറത്തിലുള്ള ആസ്റ്റർ, മഞ്ഞയും ചുവപ്പും നിറങ്ങളിലുള്ള ബട്ടണ് റോസുകള് എന്നിവയ്ക്കും വലിയ ആവശ്യക്കാരുണ്ട്. പൂക്കളത്തിന്റെ മധ്യഭാഗം മനോഹരമാക്കാൻ ഉപയോഗിക്കുന്ന സണ്ഫ്ലവർ, ഡാലിയ, താമര എന്നിവയും ഇത്തവണ വിപണിയിലുണ്ട്. പൂക്കളത്തിന് ഭംഗി കൂട്ടുന്നതിനായി സൈപ്രസ് (Cypress), ചൗക്ക (Chowka), പോഡോ (Podo) തുടങ്ങിയ പച്ചിലകളും വിപണിയില് ലഭ്യമാണ്.