ഇത്തവണത്തെ പുനർമൂല്യനിർണയത്തില് വിദ്യാർത്ഥികള്ക്ക് വൻ ഇളവുകളാണ് ബോർഡ് പ്രഖ്യാപിച്ചിരിക്കുന്നത്. മാർക്ക് പരിശോധനയ്ക്കുള്ള ഫീസ് വെറും 100 രൂപയായും, ഒരു ചോദ്യം വീതം പുനഃപരിശോധിക്കുന്നതിനുള്ള ഫീസ് 25 രൂപയായും കുത്തനെ കുറച്ചിട്ടുണ്ട്. ഇതിനുപുറമെ, പുനർമൂല്യനിർണയത്തില് മാർക്ക് വർധിക്കുകയാണെങ്കില് ഈ തുക പൂർണമായും വിദ്യാർത്ഥിക്ക് തിരികെ നല്കുമെന്ന കേന്ദ്ര വിദ്യാഭ്യാസ മന്ത്രാലയത്തിന്റെ നിർണായക പ്രഖ്യാപനവും വന്നിട്ടുണ്ട്. ഫലത്തില്, അർഹതപ്പെട്ട മാർക്ക് നഷ്ടപ്പെട്ട വിദ്യാർത്ഥികള്ക്ക് ഇത് വലിയൊരു ആശ്വാസമാണ്.
എന്നാല് ഈ ഘട്ടത്തില് എല്ലാവർക്കും അപേക്ഷിക്കാൻ കഴിയില്ലെന്ന സുപ്രധാന നിബന്ധനയും സിബിഎസ്ഇ മുന്നോട്ടുവെക്കുന്നുണ്ട്. മേയ് 20 മുതല് 25 വരെയുള്ള ആദ്യ ഘട്ടത്തില് തങ്ങളുടെ ഉത്തരക്കടലാസിന്റെ ഡിജിറ്റല് സ്കാൻ കോപ്പികള് വാങ്ങി പരിശോധിച്ച നാല് ലക്ഷത്തിലധികം വരുന്ന വിദ്യാർത്ഥികള്ക്ക് മാത്രമേ ഈ രണ്ടാം ഘട്ട പോർട്ടല് വഴി മാർക്ക് തിരുത്തലിന് അപേക്ഷിക്കാൻ യോഗ്യതയുള്ളൂ.
അപേക്ഷിക്കുന്ന വിദ്യാർത്ഥികളുടെ സ്കാൻ ചെയ്ത ഉത്തരക്കടലാസുകള് ഡിജിലോക്കർ അക്കൗണ്ടുകള് വഴിയാണ് ലഭ്യമാക്കുന്നത്. അപേക്ഷകള് സ്വീകരിച്ച് കഴിഞ്ഞ് ജൂണ് അവസാനത്തോടെയോ ജൂലൈ ആദ്യവാരത്തോടെയോ പുതുക്കിയ ഫലം പ്രസിദ്ധീകരിക്കുമെന്നാണ് സിബിഎസ്ഇ അറിയിച്ചിരിക്കുന്നത്.