ദേശീയപാതയില് റോഡരികില് നിർത്തിയിട്ട കാറിന്റെ ഡിക്കി തുറക്കുന്നതിനിടെ നിയന്ത്രണം വിട്ടെത്തിയ കണ്ടെയ്നർ ലോറി ഇടിച്ച് യുവാവ് മരിച്ചു.
കോയമ്പത്തൂർ ആണ്ടൂർ കുന്നത്തൂരമ്പാളയം സ്വദേശിയായ സഞ്ജയ് രാജ് (25) ആണ് മരിച്ചത്.
ഇന്ന് രാവിലെ 7.20ഓടെ വടക്കാഞ്ചേരിയിലെ ദേശീയപാതയില് അണക്കപ്പാറ എക്സൈസ് ഓഫീസിന് എതിർവശത്താണ് അപകടമുണ്ടായത്. പാലക്കാട് ഭാഗത്തേക്ക് സഞ്ചരിക്കുകയായിരുന്ന സഞ്ജയ് രാജ് റോഡരികില് കാർ നിർത്തിയ ശേഷം മൊബൈല് ഫോണ് ചാർജർ എടുക്കാനായി ഡിക്കി തുറന്നുനില്ക്കുന്നതിനിടെയാണ് അതേ ദിശയില് എത്തിയ കണ്ടെയ്നർ ലോറി നിയന്ത്രണം വിട്ട് കാറിന്റെ പിൻഭാഗത്തേക്ക് ഇടിച്ചുകയറിയത്.
അപകടത്തില് ഗുരുതരമായി പരിക്കേറ്റ സഞ്ജയ് രാജിനെ നാട്ടുകാർ ഉടൻ സമീപത്തെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
മൃതദേഹം ഇരട്ടക്കുളത്തെ സ്വകാര്യ ആശുപത്രി മോർച്ചറിയില് സൂക്ഷിച്ചിരിക്കുകയാണ്. അപകടത്തില്പ്പെട്ട കണ്ടെയ്നർ ലോറിയുടെ ഡ്രൈവർ വടക്കാഞ്ചേരി പോലീസിന്റെ കസ്റ്റഡിയിലാണ്. സംഭവത്തില് വടക്കാഞ്ചേരി പോലീസ് കേസെടുത്ത് അന്വേഷണം ആരംഭിച്ചു.