കൊല്ലം: തിരുവനന്തപുരത്തിന് പിന്നാലെ കൊല്ലത്തും നഗരസഭാ തെരഞ്ഞെടുപ്പിൽ ആദ്യഘട്ട സ്ഥാനാർഥികളെ പ്രഖ്യാപിച്ച് കോൺഗ്രസ്. പതിമൂന്ന് സ്ഥാനാർഥികളെയാണ് പ്രഖ്യാപിച്ചത്. മുൻ കൗൺസിലറും ഐഎൻടിയുസി ജില്ലാ അധ്യക്ഷനുമായ എകെ ഹഫീസാണ് മേയർ സ്ഥാനാർഥി. മുതിർന്ന നേതാവ് വിഎസ് ശിവകുമാറാണ് സ്ഥാനാർഥി പ്രഖ്യാപനം നടത്തിയത്.
56 സീറ്റുകളാണ് കൊല്ലം കോർപ്പറേഷനിൽ ഉള്ളത്. 26 സ്ഥാനാർഥികൾ ആയിട്ടുണ്ടെന്നും രണ്ടുദിവസത്തിനുള്ളിൽ മുഴുവൻ സ്ഥാനാർഥികളെയും പ്രഖ്യാപിക്കുമെന്നും ശിവകുമാർ പറഞ്ഞു. ഘടകകക്ഷികളുമായുള്ള ചർച്ചകൾ വളരെ സൗഹാർദപരമായി നടക്കുകയാണെന്നും ഇത്തവണ ചരിത്രം തിരുത്തിയെഴുതി യുഡിഫ് ഭരണം വരുമെന്നും ശിവകുമാർ പറഞ്ഞു.
കൊല്ലത്തിനൊപ്പം കോർപ്പറേഷനായതാണ് തൃശൂരും കണ്ണൂരും. എന്നാൽ മൂന്ന് പതിറ്റാണ്ടായി എൽഡിഎഫ് ഭരിക്കുന്ന കൊല്ലത്ത് അവർ നടപ്പാക്കിയ ഒരു പദ്ധതിയും ചൂണ്ടിക്കാണിക്കാനില്ലെന്ന് എകെ ഹഫീസ് പറഞ്ഞു. എല്ലായിടത്തും അഴിമതിയാണ്. രാഷ്ട്രീയത്തിന് അതീതമായി ഒരുഭരണമാറ്റമാണ് എല്ലാവരും ആഗ്രഹിക്കുന്നതെന്ന എകെ ഹഫീസ് പറഞ്ഞു.