സർക്കാർ, സ്വകാര്യ മേഖലകളില് ഒരുപോലെ ആർത്തവ അവധി നിർബന്ധമാക്കി കർണാടക സർക്കാരിന്റെ സുപ്രധാന തീരുമാനം.
മാസത്തില് ശമ്ബളത്തോട് കൂടിയുള്ള ഒരു അവധി വനിതാ ജീവനക്കാർക്ക് നിർബന്ധമാക്കുന്ന മെൻസ്ട്രുല് പോളിസി 2025 ന് മന്ത്രിസഭാ യോഗം അംഗീകാരം നല്കി. ഇതോടെ ബീഹാറിനും ഒഡിഷക്കും പിന്നാലെ ആർത്തവ അവധി നിർബന്ധമാക്കുന്ന സംസ്ഥാനമായി കർണാടക മാറി. എന്നാല് ഈ രണ്ട് സംസ്ഥാനങ്ങളിലും സർക്കാർ മേഖലയിലെ വനിതാ ജീവനക്കാർക്ക് മാത്രമായിരുന്നു അവധി ബാധകം. കർണാടകയിലാകട്ടെ സർക്കാർ മേഖലയില് മാത്രമല്ല, സ്വകാര്യ മേഖലയില് കൂടി നിയമം പ്രവർത്തികമാക്കിയിരിക്കുകയാണ്. ഇന്ത്യയില് ആദ്യമായാണ് ഇത്തരത്തില് സർക്കാർ - സ്വകാര്യ മേഖലകളില് മാസത്തില് ഒരു ദിവസം ശമ്ബളത്തോടെയുള്ള ആർത്തവ അവധി യാഥാർത്ഥ്യമാകുന്നത്.
30 ലക്ഷത്തോളം കോർപ്പറേറ്റ് തൊഴിലാളികള് ഉള്പ്പെടെ 60 ലക്ഷത്തിലധികം സ്ത്രീകള് സംസ്ഥാനത്ത് വിവിധ തൊഴിലുകളില് ഏർപ്പെടുന്നുണ്ടെന്നാണ് കർണാടക സർക്കാരിന്റെ കണക്കുകള് വ്യക്തമാക്കുന്നത്. ആർത്തവ അവധി പ്രാബല്യത്തില് വരുന്നതിന് മുൻപായി ബോധവത്കരണ യോഗങ്ങള് സംഘടിപ്പിക്കുമെന്നും അധികാരികള് അറിയിച്ചു. പുതിയ നയം പ്രഖ്യാപിച്ചതോടെ ആർത്തവ അവധി നല്കുന്ന ബീഹാർ, ഒഡീഷ സംസ്ഥാനങ്ങള്ക്കൊപ്പം ഉള്പ്പെട്ടിരിക്കുകയാണ് കർണാടക.