മുഖ്യമന്ത്രിയുടേയോ മന്ത്രിമാരുടേയോ പേര് എഴുതുന്നതിന് മുൻപായി ബഹുമാനാർഥം ഉപയോഗിക്കുന്ന 'ബഹു' ചേർക്കാൻ മറക്കരുതെന്ന് സർക്കാർ ഉദ്യോഗസ്ഥരെ ഓർമിപ്പിച്ച് സർക്കുലർ.
ഉദ്യോഗസ്ഥ ഭരണപരിഷ്കാര വകുപ്പാണ് ഇത് സംബന്ധിച്ച സർക്കുലർ പുറത്തിറക്കിയത്. ഔദ്യോഗിക കത്തിടപാടുകളിലും പരാതികള്ക്കും നിവേദനങ്ങള്ക്കുമുള്ള മറുപടികളിലും ഇത്തരത്തില് 'ബഹു' ചേർക്കണമെന്നാണ് നിർദേശം.
'പൊതുജനങ്ങള് വിവിധ ആവശ്യങ്ങള് ഉന്നയിച്ചുകൊണ്ട് ബഹു. മുഖ്യമന്ത്രി, ബഹു. മന്ത്രിമാർ എന്നിവർക്ക് നല്കുന്ന നിവേദനങ്ങള്/പരാതികള് എന്നിവ പരിശോധനാ വിധേയമാക്കിയശേഷം ബന്ധപ്പെട്ട ഓഫീസുകളില്നിന്ന് നടപടികള് സ്വീകരിച്ചതിന്റെ ഭാഗമായി നിവേദകർക്കും അപേക്ഷകർക്കും നല്കുന്ന മറുപടി സംബന്ധമായ കത്തിടപാടുകളില് ബഹുമാന സൂചകമായി ബഹു. മുഖ്യമന്ത്രി, ബഹു. മന്ത്രി എന്ന് രേഖപ്പെടുത്തേണ്ടതാണ്', സർക്കുലറില് പറയുന്നു.