തിരുവനന്തപുരം : കുടുക്കാൻ ശ്രമങ്ങള്‍ നടക്കുന്നുവെന്ന ഡോ. ഹാരിസിന്റെ ആരോപണങ്ങള്‍ക്ക് മറുപടിയുമായി മെഡിക്കല്‍ കോളേജ് പ്രിൻസിപ്പല്‍ പികെ ജബ്ബാർ.
ഡോ. ഹാരിസിന്റെ ഓഫീസ് മുറി തുറന്നത് പരിശോധനയുടെ ഭാഗമായാണെന്നും ഉത്തരവാദിത്തപ്പെട്ടവരല്ലാതെ മറ്റാരും മുറിയില്‍ കയറിയിട്ടില്ലെന്നും അദ്ദേഹം പറഞ്ഞു. കൂടാതെ പരിശോധനയ്ക്കിടെ ഹാരിസിന്റെ മുറിയില്‍ ചില അസ്വാഭാവികതകള്‍ കണ്ടെത്തിയതായും പികെ ജബ്ബാർ വാർത്തസമ്മേളനത്തില്‍ പറഞ്ഞു.
മെഡിക്കല്‍ കോളേജില്‍ നിന്ന് കാണാതായെന്ന് പറഞ്ഞ ഉപകരണം ഡോ. ഹാരിസിന്റെ മുറിയില്‍ നിന്നും കണ്ടെത്തി. എന്നാല്‍, പുതിയ ബോക്സാണ് ഇത്. ആഗസ്റ്റ് രണ്ടിന് ഉപകരണം വാങ്ങിയതിന്റെ ബില്ലാണ് അതില്‍ ഉള്ളത്. കഴിഞ്ഞ ദിവസമാണ് മെഡിക്കല്‍ കോളേജ് പ്രിൻസിപ്പലിന്റെ സാന്നിധ്യത്തില്‍ ഡോ.ഹാരിസിന്റെ ഓഫീസ് മുറിയില്‍ പരിശോധന നടത്തിയത്. ആദ്യ ദിവസം വകുപ്പ് മേധാവിയുടെ മുറി പരിശോധിച്ചിരുന്നില്ല. എന്നാല്‍, ഇന്നലെ നടത്തിയ പരിശോധനയ്ക്കിടെ ചില അസ്വാഭാവികതകള്‍ കണ്ടെത്തി. മെഡിക്കല്‍ കോളേജില്‍ നിന്നും കാണാതായ ഉപകരണം ഹാരിസിന്റെ മുറിയില്‍ നിന്നും കണ്ടെത്തി. അത് പക്ഷേ പുതിയ ബോക്സ് ആണെന്നും ആഗസ്റ്റ് രണ്ടിന് ഉപകരണം വാങ്ങിയതിന്റെ ബില്ലാണ് അതിലുള്ളതെന്നും മെഡിക്കല്‍ കോളേജ് പ്രിൻസിപ്പല്‍ പറയുന്നു. പുതുതായി കണ്ടെത്തിയ ഉപകരണത്തിന്റെ ഫോട്ടോ പഴയ ഫോട്ടോയുമായി മാച്ച്‌ ചെയ്യുന്നില്ല. മാത്രമല്ല, മുറിയിലേക്ക് ഒരാള്‍ കയറുന്നതിന്റെ സിസിടിവി ദൃശ്യങ്ങള്‍ ലഭിച്ചിട്ടുണ്ട്. എന്നാല്‍, ഇത് ഏത് ദിവസം ആണെന്ന് പരിശോധിക്കണമെന്നും അദ്ദേഹം വാർത്തസമ്മേളനത്തില്‍ പറഞ്ഞു.
ഉപകരണം കാണാതായെന്ന കാര്യം വിദഗ്ധ സമിതിയാണ് കണ്ടെത്തിയത്. എന്നാല്‍, ഉപകരണം നഷ്ടപ്പെട്ടിട്ടില്ലെന്നും അത് ആശുപത്രിയില്‍ തന്നെ ഉണ്ടെന്നും ഡോ ഹാരിസ് പറഞ്ഞിരുന്നു. ഡോ. ഹാരിസിന്റെ മുറിയില്‍ നിന്നും ഉപകരണം കണ്ടെത്തിയ സംഭവത്തില്‍ അന്വേഷണം വേണമെന്നും മെഡിക്കല്‍ കോളേജ് പ്രിൻസിപ്പല്‍ പികെ ജബ്ബാർ പറയുന്നു.