പാലക്കാട്: സ്ത്രീകൾക്കെതിരെ മോശം പെരുമാറ്റത്തിന് കോൺഗ്രസ് സസ്പെൻഡ് ചെയ്ത രാഹുൽ മാങ്കൂട്ടത്തിൽ എംഎൽഎയെ പാലക്കാട് വീണ്ടുമെത്തിക്കാൻ രഹസ്യയോഗം. കെപിസിസി വർക്കിങ് പ്രസിഡന്റ് ഷാഫി പറമ്പിൽ എംപിയുടെ നേതൃത്വത്തിൽ കോൺഗ്രസിലെ എ ഗ്രൂപ്പ് ആണ് രഹസ്യയോഗം ചേർന്നത്.
ലൈംഗികാരോപണം ഉയർന്നതിനുശേഷം ഇതുവരെ രാഹുൽ മാങ്കൂട്ടത്തിൽ മണ്ഡലമായ പാലക്കാട് എത്തിയിട്ടില്ല. സ്വദേശമായ അടൂരിലെ സ്വന്തം വീട്ടിൽ തന്നെ തുടരുകയാണ്. രാഹുൽ മാങ്കൂട്ടത്തിലിന്റെ മണ്ഡലത്തിലെ തുടർച്ചയായ അസാന്നിധ്യം കോൺഗ്രസിന് തിരിച്ചടിയാകുമെന്നാണ് ഷാഫി പറമ്പിലും രാഹുൽ മാങ്കൂട്ടത്തിൽ അനുകൂലികളും വാദിക്കുന്നത്.
ഇതേത്തുടർന്നാണ് ഷാഫിയുടെ നേതൃത്വത്തിൽ എ ഗ്രൂപ്പിലെ നേതാക്കൾ യോഗം ചേർന്നത്. ലൈംഗികാരോപണത്തിന്റെ പശ്ചാത്തലത്തിൽ സർക്കാർ പരിപാടികളിലും നഗരസഭ പരിപാടികളിലും രാഹുൽ മാങ്കൂട്ടത്തിൽ പങ്കെടുക്കുന്നത് വലിയ പ്രതിഷേധത്തിന് ഇടയാക്കും. പാർട്ടിയിൽ നിന്നും സസ്പെന്റ് ചെയ്തതിനാൽ കോൺഗ്രസ് പരിപാടികളിലും രാഹുലിന് ഇടമുണ്ടാകില്ല.
ആ സാഹചര്യത്തിൽ എങ്ങനെ സുരക്ഷിതമായി രാഹുൽ മാങ്കൂട്ടത്തിലിനെ മണ്ഡലത്തിൽ സജീവമാക്കാം എന്നതാണ് രഹസ്യയോഗം ചർച്ച ചെയ്തതെന്നാണ് സൂചന. വിവിധ ക്ലബ്ബുകളുടെയും അസോസിയേഷനുകളുടെയും യോഗത്തിൽ രാഹുൽ മാങ്കൂട്ടത്തിലിനെ പങ്കെടുപ്പിക്കാനാണ് നീക്കം. അതേസമയം ഉടൻ രാഹുൽ മാങ്കൂട്ടത്തിൽ പാലക്കാട് എത്തുന്നത് വലിയ പ്രതിഷേധത്തിന് വഴിവെക്കുമെന്നും യോഗം വിലയിരുത്തി.
കോൺഗ്രസ് നേതൃത്വം സസ്പെൻഡ് ചെയ്ത രാഹുൽ മാങ്കൂട്ടത്തിലിന് പാർട്ടി സുരക്ഷ ഒരുക്കേണ്ട കാര്യമില്ലെന്നാണ് പാലക്കാട് ഡിസിസി പ്രസിഡന്റ് കഴിഞ്ഞദിവസം വ്യക്തമാക്കിയത്. ലൈംഗിക പീഡന ആരോപണങ്ങൾ നേരിടുന്ന രാഹുൽ മാങ്കൂട്ടത്തിൽ എംഎൽഎയ്ക്കെതിരെ ക്രൈംബ്രാഞ്ച് കേസെടുത്തിരുന്നു. പെൺകുട്ടികളെ പിന്തുടർന്നു ശല്യപ്പെടുത്തി എന്ന കുറ്റത്തിനാണ് കേസെടുത്തത്. കേസിൽ നാളെ ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ട് ക്രൈംബ്രാഞ്ച് രാഹുൽ മാങ്കൂട്ടത്തിലിന് നോട്ടീസ് നൽകിയിട്ടുണ്ട്.