സംസ്ഥാനത്തെ 240 യൂണിറ്റില്‍ താഴെ വൈദ്യുതി ഉപഭോഗമുള്ള ഉപഭോക്താക്കള്‍ക്കായി നിലവില്‍ നല്‍കിവരുന്ന സബ്സിഡി നിലച്ചേക്കാനുള്ള സാധ്യത ഉയരുകയാണ്.
കണക്ഷനുകളുടെ വലിയൊരു ശതമാനവും, ഏകദേശം 65 ലക്ഷത്തിലധികം ഉപഭോക്താക്കളാണ് ഈ വിഭാഗത്തില്‍പ്പെടുന്നത്. ഇലക്‌ട്രിസിറ്റി ഡ്യൂട്ടി ആകെ പിരിവില്‍ നിന്നാണ് കെഎസ്‌ഇബി (കേരള സ്റ്റേറ്റ് ഇലക്‌ട്രിസിറ്റി ബോർഡ്) സബ്സിഡിക്ക് തുക കണ്ടെത്തുന്നത്. എന്നാല്‍ ഇപ്പോള്‍ ഈ രീതിയില്‍ തുകയെടുക്കുന്നത് ചോദ്യംചെയ്തുകൊണ്ട് ഹൈക്കോടതിയില്‍ കേസാണ് നിലനില്ക്കുന്നത്. ഈ സാഹചര്യത്തില്‍ സബ്സിഡി തുടരാന്‍ സാധിക്കുമോ എന്നത് അസ്പഷ്ടമാണ്.
2012-ല്‍ ഉമ്മൻചാണ്ടി മുഖ്യമന്ത്രിയായിരുന്ന കാലത്ത് വൈദ്യുതി നിരക്ക് വര്‍ധിപ്പിച്ചപ്പോഴാണ് 240 യൂണിറ്റിന് താഴെ ഉപഭോഗമുള്ള ഉപഭോക്താക്കളെ രക്ഷിക്കാനായി സബ്സിഡി പദ്ധതി പ്രഖ്യാപിച്ചത്. നിരക്ക് വര്‍ധനയുടെ ആഘാതം ഇവർക്കുണ്ടാകാതിരിക്കാൻ ആ കാലഘട്ടത്തിലെ യുഡിഎഫ് സർക്കാർ തന്നെ ഈ ആവിശ്യം പരിഗണിച്ചു. ഈ പ്രകാരം സർക്കാർ കെഎസ്‌ഇബിയ്ക്ക് സബ്സിഡിക്കായി സാമ്ബത്തിക സഹായം നല്‍കുകയായിരുന്നു. എന്നാല്‍ ഈ സഹായം അടുത്തിടെ കാര്യമായി കുറഞ്ഞതോടെ കെഎസ്‌ഇബി തന്നെ അനുഭവിക്കേണ്ട ധനബാധ്യത ഉയരുകയായിരുന്നു.
കെഎസ്‌ഇബി ട്രസ്റ്റിന്റെ പെന്‍ഷന്‍ ബാധ്യതയുടെ 65.4 ശതമാനവും ബോര്‍ഡും ബാക്കി 34.6 ശതമാനം സര്‍ക്കാരും ഏറ്റെടുക്കണമെന്ന് ഒരു തീരുമാനം നേരത്തെ ഉണ്ടായിരുന്നെങ്കിലും, പിന്നീട് ഇത് തുടരാന്‍ സര്‍ക്കാര്‍ താത്പര്യം കാണിക്കാതിരുന്നതാണ് പ്രശ്‌നത്തിന് വഴിയൊരുക്കിയത്. 10 വര്‍ഷത്തേക്ക് മാത്രമാണ് സര്‍ക്കാര്‍ ഉത്തരവിലൂടെ തുക ഏറ്റെടുത്തത്, തുടര്‍ന്ന് അത് പുതുക്കിയില്ല. ഇതോടെ സബ്സിഡി ചെലവിന് പുറമേ പെൻഷൻ ബാധ്യതയും കെഎസ്‌ഇബിക്ക് ഭാരമായിത്തുടങ്ങി.
പെന്‍ഷന്‍ ബാധ്യതയുമായി ബന്ധപ്പെട്ട പുതിയ നടപടി സര്‍ക്കാര്‍ പിൻവലിച്ചതിനെതിരെ കെഎസ്‌ഇബി പെൻഷനേഴ്സ് കൂട്ടായ്മ ഹൈക്കോടതിയെ സമീപിച്ചു. ഇലക്‌ട്രിസിറ്റി ഡ്യൂട്ടി സംബന്ധിച്ച സര്‍ക്കാര്‍ ഉത്തരവ് ഹൈക്കോടതി ചോദ്യം ചെയ്തതോടെയാണ് കെഎസ്‌ഇബിക്ക് സബ്സിഡി തുക ഉറപ്പാക്കുന്നത് പ്രശ്‌നമായത്. ഇതോടെ 240 യൂണിറ്റിന് താഴെ വൈദ്യുതി ഉപയോഗിക്കുന്നവർക്ക് ഇനി ഈ സഹായം ലഭിക്കുമോ എന്ന സംശയം ശക്തമാണ്. കേസ് ഉടൻ പരിഹരിക്കപ്പെടില്ലെങ്കില്‍, ഇതിനൊടുവില്‍ ഉപഭോക്താക്കള്‍ക്ക് വലിയ സാമ്ബത്തിക ബാധ്യത നേരിടേണ്ടിവന്നേക്കും.