കോട്ടയം: കോട്ടയം മെഡിക്കൽ കോളജിൽ ഉപയോഗ ശൂന്യമായ കെട്ടിടം തകർന്ന് വീണ് ഒരാൾ മരിച്ച സംഭവത്തിൽ ആരോഗ്യ മന്ത്രിയുടെ രാജി ആവശ്യപ്പെട്ടുള്ള പ്രതിഷേധങ്ങൾ തള്ളി മന്ത്രി വി എൻ വാസവൻ. തകർന്ന കെട്ടിടം മന്ത്രി വന്ന് ഉരുട്ടിയിട്ടതാണോ എന്ന ചോദ്യം ഉയർത്തിയാണ് മന്ത്രി വാസവന്റെ പ്രതിരോധം.
''അപകടം ഉണ്ടായതിന്റെ പേരിൽ മന്ത്രി രാജി വയ്ക്കണം എന്നുണ്ടോ. കർണാടകയിൽ ക്രിക്കറ്റ് താരങ്ങൾ വന്നപ്പോൾ അപകടം ഉണ്ടായി. അന്ന് ആരെങ്കിലും ആരുടെയെങ്കിലും രാജി ആവശ്യപ്പെട്ടിരുന്നോ. വിമാന അപകടം നടന്നാൽ പ്രധാനമന്ത്രി രാജി വയ്ക്കണം എന്നാണോ''- എന്നും മന്ത്രി വി എൻ വാസവൻ ചോദിച്ചു.
കോട്ടയം മെഡിക്കൽ കോളജ് അപകടത്തിൽ സർക്കാരിന് എതിരെ പ്രതിപക്ഷ സംഘടനകളുടെ പ്രതിഷേധം സംസ്ഥാന വ്യാപകമായി ശക്തമാകുകയാണ്. അങ്കമാലിയിൽ മന്ത്രി വി എൻ വാസവനെതിരെയും പ്രതിഷേധം അരങ്ങേറി. അങ്കമാലിയിൽ വച്ച് യൂത്ത് കോൺഗ്രസ് പ്രവർത്തകർ മന്ത്രിയെ കരിങ്കൊടി കാട്ടി. ആരോഗ്യമന്ത്രിക്ക് എതിരായ പ്രതിഷേധങ്ങളുടെ ഭാഗമായി വിവിധ ജില്ലകളിൽ ഡിഎംഒ ഓഫീസിലേക്ക് ഉൾപ്പെടെ പ്രതിപക്ഷ സംഘടനകൾ മാർച്ച് നടത്തിയിരുന്നു. വയനാട് മെഡിക്കൽ കോളേജിൽ റീത്ത് വച്ചയായിരുന്നു യൂത്ത് കോൺഗ്രസ് പ്രതിഷേധം.