കന്യാസ്ത്രീകള്‍ക്ക് ഉടനെ ജാമ്യം ലഭിക്കുമെന്നും അതിനുള്ള ഉറപ്പ് പ്രധാനമന്ത്രിയും ആഭ്യന്തരമന്ത്രിയും തന്നിട്ടുണ്ടെന്നും ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ.
ഛത്തീസ്ഗഢില്‍ കന്യാസ്ത്രീകള്‍ അറസ്റ്റിലായതിന്റെ പശ്ചാത്തലത്തില്‍ സിറൊ മലബാർസഭാ ആസ്ഥാനത്തെത്തി കൂടിക്കാഴ്ച നടത്തിയതിന് ശേഷം മാധ്യമങ്ങളെ കാണുകയായിരുന്നു രാജീവ് ചന്ദ്രശേഖർ.
ഛത്തീസ്ഗഢ്, ഝാർഖണ്ഡ് തുടങ്ങിയ സംസ്ഥാനങ്ങളില്‍ മതപരിവർത്തനവും മനുഷ്യക്കടത്തും സംബന്ധിച്ച നിരവധി പ്രശ്നങ്ങളുണ്ട്. അവിടെ അത് വളരെ വൈകാരികമായ പ്രശ്നങ്ങളാണ്. അവിടെ നിയമസഭ പാസാക്കിയ നിയമങ്ങളുമുണ്ട്. അതിനെയെല്ലാം മനസിലാക്കി കുറച്ച്‌ പക്വതയോടെ ഇതിനെ കാണണമായിരുന്നുവെന്ന് അദ്ദേഹം പറഞ്ഞു.
രണ്ടുദിവസത്തിനുള്ളില്‍ കന്യാസ്ത്രീകള്‍ക്ക് ജാമ്യം ലഭിക്കുമെന്നാണ് മനസിലാക്കുന്നത്. ജാമ്യാപേക്ഷയെ സംസ്ഥാന സർക്കാർ എതിർക്കില്ല എന്നുള്ള ഉറപ്പ് ലഭിച്ചിട്ടുണ്ട്. അതിനാവശ്യമായ കാര്യങ്ങള്‍ ചെയ്യുമെന്ന് പ്രധാനമന്ത്രിയും ആഭ്യന്തര മന്ത്രിയും ഉറപ്പ് നല്‍കിയിരുന്നു. അക്കാര്യം അറിയിക്കാനാണ് സഭാ ആസ്ഥാനത്തെത്തിയതെന്നും രാജീവ് ചന്ദ്രശേഖർ പറഞ്ഞു.