സൂംബ വേറെ ലെവലാണ് സാറേ! പരിശീലകേന്ദ്രങ്ങളിലും ജിമ്മുകളിലും മാത്രം ഒതുങ്ങി നിന്ന സൂംബ സ്കൂളുകളിലേക്ക് വരിയാണ്. ലഹരി വിരുദ്ധ പ്രവർത്തനങ്ങളുടെ ഭാഗമായി മുഴുവൻ കുട്ടികളെയും സ്‌കൂളുകളിൽ സൂംബ ഡാൻസ്‌ പരിശീലിപ്പിക്കാൻ മുഖ്യമന്ത്രി പിണറായി വിജയൻ നിർദേശം നൽകിയിരുന്നു. ഈ വരുന്ന അധ്യയന വർഷം മുതൽ പദ്ധതി നടപ്പാക്കാനാണ് സർക്കാരിന്റെ തീരുമാനം.
കായിക വ്യായാമങ്ങൾ തീർച്ചയായും കുട്ടികളുടെ മാനസികവും ശാരീരികവുമായ ആരോഗ്യം മെച്ചപ്പെടുന്നതിനും അവരുടെ ശ്രദ്ധയും ഏകാഗ്രതയും വർധിപ്പിക്കാനും ഗുണകരമാണെന്ന് തിരുവനന്തപുരം മെഡി. കോളജ് സൈക്യാട്രി വിഭാഗം പ്രൊഫസറായ ഡോ. അരുൺ ബി നായർ സമകാലിക മലയാളത്തോട് പറയുന്നു. ഇതുമായി ബന്ധപ്പെട്ട് ലോകത്തിന്റെ പലഭാഗങ്ങളിൽ നിന്ന് പഠനങ്ങൾ ഉണ്ടായിട്ടുണ്ട്. കളികളിലൂടെയുള്ള കുട്ടികളുടെ മാനസിക-സാമൂഹിക വളർച്ചയെ കുറിച്ച് വിശദമായി തന്നെ ഈ പഠനങ്ങൾ വിശദീകരിക്കുന്നു.
കുട്ടികൾ കളിക്കുമ്പോൾ, അത് ശാരീരിക വ്യായാമം എന്നതിനെക്കാൾ സാമൂഹികവൽക്കണത്തിന് കൂടി ഇടം നൽകുന്നു. ഒപ്പം ജീവിത നിപുണത വിദ്യാഭ്യാസത്തിനുള്ളൊരു അവസം കൂടി കുട്ടികൾക്ക് ഇതിലൂടെ ലഭിക്കുന്നുവെന്നും അദ്ദേഹം പറയുന്നു. കളിയിൽ ജയവും തോൽവിയും വരുന്നുണ്ട്. അതിലൂടെ ജീവിതം എന്താണെന്നും ജീവിതത്തിന്റെ സ്വഭാവമെന്താണെന്നതൊക്കെ മനസിലാക്കാൻ കുട്ടികളെ സഹായിക്കും. ജീവിതത്തിലെ പ്രതിസന്ധി നേരിടാൻ അവരെ പാകപ്പെടുത്തുകയും ചെയ്യുന്നു. സമപ്രായക്കാരുടെ സമ്മർദം എതിർക്കാൻ അടക്കമുള്ള സ്വഭാവ ദൃഢതയും ഇത്തരം പ്രവർത്തനങ്ങളിലൂടെ കുട്ടികൾക്ക് കിട്ടുന്നു. അതുകൊണ്ടാണ് കായിക വ്യായാമങ്ങളും കളികളും കുട്ടികളുടെ ദിനചര്യയിൽ ഉൾപ്പെടുത്തണമെന്ന് പറയുന്നതിന് പിന്നിലെ മനഃശാസ്ത്രം.
എന്നാൽ സൂംബ പോലുള്ള വ്യായാമ രീതിയിലൂടെ വ്യായാമം എന്ന ആദ്യ ഭാഗം മാത്രമാണ് ലഭിക്കുക. ഒരു ദിവസം ഒരു മണിക്കൂർ നേരം സൂര്യപ്രകാശം കൊണ്ടുള്ള കായിക വ്യായാമം ചെയ്യുന്നതാണ് കുട്ടികൾ കൂടുതൽ ആരോഗ്യകരം. അതിന് നിരവധി ഗുണങ്ങളുണ്ട്.
ഒരു മണിക്കൂറെങ്കിലും കായിക വ്യായാമം ചെയ്യുന്ന കുട്ടികളുടെ തലച്ചോറിൽ ഡോപ്പമിൻ അളവും കൂടാൻ സഹായിക്കും. അത് അവരിൽ ശ്രദ്ധയും ഏകാഗ്രയും മെച്ചപ്പെടാൻ സഹായിക്കും. അത് പഠന മികവ് വർധിപ്പിക്കാൻ സഹായിക്കും.
കായിക വ്യായാമത്തിലൂടെ കുട്ടികളിൽ എൻഡോർഫിൻ എന്ന ഹോർമോണിൻറെ അളവു കൂടാൻ സഹായിക്കും. ഇത് അവർ സന്തുഷ്ടരാകാൻ സഹായിക്കും. തലയിലെ രക്തയോട്ടം കൂടാനും അതുവഴി അവർ കൂടുതൽ ഊർജ്ജസ്വലരാകാനും സഹായിക്കും.
സൂര്യപ്രകാശം കൊണ്ട് വ്യായാമം ചെയ്യുന്നത് അൾട്രവൈലറ്റ് ബി കിരണങ്ങൾ ത്വക്കിലേറ്റ് കൊളസ്ട്രോൾ ഘടങ്ങളിൽ പ്രവർത്തിച്ച് അവയെ വിറ്റാമിൻ ഡി ആയി പരിവർത്തനപ്പെടുത്താൻ സഹായിക്കും. വിറ്റാമിൻ ഡി കുട്ടികളെ സംബന്ധിച്ചിടത്തോളം എല്ലുകളുടെയും പല്ലിന്റെ ബലത്തിനും കായിക ക്ഷമതയ്ക്കും സഹായിക്കും. കൂടാതെ രോഗപ്രതിരോധ ശേഷി മെച്ചപ്പെടാനും തലച്ചോറിന്റെ വിജ്ഞാന വിശകലന ശേഷം മെച്ചപ്പെടാനും സഹായിക്കും.
ക്ലാസ് ആരംഭിക്കുന്നതിന് മുൻപ് സൂംബ നൃത്തം, യോഗ പോലുള്ളവ ഉൾപ്പെടുത്തുന്നത് തുടക്കത്തിലുള്ള മടുപ്പ് മാറാനും കുട്ടികളെ ഊർജ്ജസ്വലരാക്കാനും സഹായിക്കും. എന്നാൽ ദീർഘനേരം അതിന്റെ ഗുണം ലഭിക്കണമെങ്കിൽ ദിവസവും ഒരു മണിക്കൂറെങ്കിലും കായിക വ്യായാമത്തിനുള്ള അവസരം ഉണ്ടായിരിക്കണമെന്നും ഡോ. അരുൺ ബി നായർ പറയുന്നു.
കൂടുതൽ കുട്ടികൾ ഒരുമിച്ച് ഒരു ടീം ആയി ചെയ്യുന്നതു കൊണ്ട് തന്നെ കുട്ടികളിൽ ശാരീരികവും മാനസികവുമായി ഗുണങ്ങൾ ഉണ്ടാക്കുമെന്ന് തിരുവനന്തപുരം, എസ് യു ടി ഹോസ്പിറ്റൽ, ന്യൂറോസർജൻ ഡോ. മനോജ് വെള്ളനാട് സമകാലിക മലയാളത്തോട് പറയുന്നു. സൂംബ ഒരു കാർഡിയോവാസ്കുലാർ വ്യായാമമാണ്. ഇത് ഹൃദയാരോഗ്യവും ശ്വാസകോശത്തിന്റെയും ആരോഗ്യം മെച്ചപ്പെടാൻ സഹായിക്കും. ഇന്നത്തെ കുട്ടികളിൽ പ്രമേഹം, ഉയർന്ന രക്തസമ്മർദം, പൊണ്ണത്തടി പോലുള്ള ജീവിതശൈലി രോഗങ്ങളുടെ തോത് കൂടുതലാണ്.
ശരീരഭാരം കുറയ്ക്കാൻ സഹായിക്കുന്ന ഒരു വ്യായാമ രീതിയാണ് സൂംബ. കുട്ടികളിൽ പേശിബലവും വഴക്കവും വർധിക്കാൻ ഇത്തരം ശാരീരിക പ്രവർത്തനങ്ങൾ സഹായിക്കും. ഒരു മണിക്കൂർ സൂംബ ചെയ്താൽ ഏതാണ്ട് 300 കലോറിയോളം ഇല്ലാതാക്കാൻ സഹായിക്കും. കുട്ടികളിൽ ദിവസവും ഒരു 15 മിനിറ്റ് ചെയ്താൽ തന്നെ അത് അവരിൽ അധിക കലോറി നീക്കാൻ സഹായിക്കും. ഇത് അധികം സ്കിൽ ആവശ്യമുള്ള വ്യായാമ രീതിയല്ല. നൃത്തം അറിയാത്തവർക്കും സൂംബ ചെയ്യാം. കൂടുതൽ രസകരമാണ്. അതുകൊണ്ട് തന്നെ കുട്ടികൾ അത് കൂടുതൽ ആസ്വദിക്കാം.