മുംബൈ: ആഭ്യന്തര ക്രിക്കറ്റിലും പിന്നാലെ ഐപിഎല്ലിലും മിന്നും ഫോമിൽ ബാറ്റ് വീശുന്ന കരുൺ നായരുടെ ഫോം ഒടുവിൽ ബിസിസിഐയുടെ റഡാറിൽ കുടുങ്ങി. നീണ്ട ഇടവേളയ്ക്കു ശേഷം കരുൺ ഇന്ത്യൻ ടീമിൽ. ഇംഗ്ലണ്ട് പര്യടനത്തിനുള്ള ഇന്ത്യ എ ടീമിൽ കരുണിനേയും ഉൾപ്പെടുത്തി.
അഭിമന്യു ഈശ്വരനാണ് ടീം ക്യാപ്റ്റൻ. ഇടവേളയ്ക്കു ശേഷം ഇഷാൻ കിഷനും ടീമിലെത്തി. യശസ്വി ജയ്‌സ്വാൾ, ശുഭ്മാൻ ഗിൽ, സായ് സുദർശൻ എന്നിവരും ടീമിലുണ്ട്. ധ്രുവ് ജുറേലാണ് ടീമിന്റെ വൈസ് ക്യാപ്റ്റൻ. ഗില്ലും സായ് സുദർശനും രണ്ടാം മത്സരത്തിനു മുന്നോടിയായാണ് ടീമിനൊപ്പം ചേരുക.
പരിക്കേറ്റ് ഐപിഎൽ നഷ്ടമായ ചെന്നൈ സൂപ്പർ കിങ്‌സ് നായകൻ ഋതുരാജ് ഗെയ്ക്‌വാദ്, സർഫറാസ് ഖാൻ എന്നിവരും ടീമിലുണ്ട്. നിതീഷ് കുമാർ റെഡ്ഡി, ശാർദുൽ ഠാക്കൂർ എന്നിവരും ടീമിൽ ഇടംപിടിച്ചിട്ടുണ്ട്.
ഇന്ത്യൻ സീനിയർ ടീമിന്റെ ഇംഗ്ലണ്ട് പര്യടനത്തിനു മുന്നോടിയായി ഇന്ത്യ എ ടീം രണ്ട് ഫസ്റ്റ് ക്ലാസ് മത്സരങ്ങൾ ഇംഗ്ലണ്ടിൽ കളിക്കും. ഇംഗ്ലണ്ട് ലയൺസിനെതിരെയാണ് എ ടീമിന്റെ പോരാട്ടം. ഈ മത്സരങ്ങളിൽ മികവു കാണിക്കുന്നവർക്ക് ടെസ്റ്റ് പോരാട്ടത്തിനുള്ള ടീമിലേക്ക് വിളിയെത്തും. ഈ മാസം 30, ജൂൺ ആറ് തീയതികളിലാണ് രണ്ട് മത്സരങ്ങൾ.
ഇന്ത്യ എ ടീം: അഭിമന്യു ഈശ്വരൻ (ക്യാപ്റ്റൻ), യശസ്വി ജയ്‌സ്വാൾ, കരുൺ നായർ, ധ്രുവ് ജുറേൽ, നിതീഷ് കുമാർ റെഡ്ഡി, ശാർദുൽ ഠാക്കൂർ, ഇഷാൻ കിഷൻ, മാനവ് സുതർ, തനുഷ് കൊടിയാൻ, മുകേഷ് കുമാർ, ആകാശ് ദീപ്, ഹർഷിത് റാണ, അൻഷുൽ കാംബോജ്, ഖലീൽ അഹമദ്, ഋതുരാജ് ഗെയ്ക്‌വാദ്, സർഫറാസ് ഖാൻ, തുഷാർ ദേശ്പാണ്ഡെ, ഹർഷ് ദുബെ.