‘എമ്പുരാൻ’ നൽകിയ പുത്തനുണർവിന് ശേഷം തീയറ്ററുകൾക്ക് ഉത്സവമായി വിഷു ചിത്രങ്ങൾ എത്തുന്നു. മൂന്ന് വമ്പൻ ചിത്രങ്ങളാണ് ഇത്തവണ വിഷുക്കണിയുമായി കൊട്ടക നിറയ്ക്കാനെത്തുന്നത്. മമ്മൂട്ടിച്ചിത്രം 'ബസൂക്ക', നസ്‌ലിന്റെയും ടീമിന്റെയും 'ആലപ്പുഴ ജിംഖാന', ബേസിൽ ജോസഫിന്റെ 'മരണമാസ്' എന്നിവയാണ് മലയാളത്തിലെ വിഷു റിലീസുകൾ. ഇതോടൊപ്പം തന്നെ തമിഴിൽ അജിത്തിന്റെ ഗുഡ് ബാഡ് അഗ്ലിയും കേരളത്തിൽ റിലീസിനെത്തുന്നുണ്ട്. മലയാള സിനിമാ ചരിത്രത്തിൽ റെക്കോർഡുകൾ തിരുത്തിക്കൊണ്ടാണ് മോഹൻലാലിനെ നായകനാക്കി പൃഥ്വിരാജ് സുകുമാരൻ ഒരുക്കിയ എമ്പുരാൻ എത്തിയത്. വിവാദങ്ങൾ കൊഴുക്കുന്നതിനിടയിലും കേരളത്തിൽനിന്ന് മാത്രമായി 80 കോടിയിലധികം ഗ്രോസ് കളക്ഷൻ നേടുന്ന ചിത്രമെന്ന നേട്ടമാണ് എമ്പുരാൻ സ്വന്തമാക്കിയത്. തൊട്ടുപിന്നാലെ മമ്മൂട്ടി ചിത്രവും എത്തുന്നത് ആരാധകരെ തെല്ലൊന്നുമല്ല ആവേശത്തിലാക്കുന്നത്. വിഷുവിനു പിന്നാലെ ഈസ്റ്ററിനും ഏപ്രിൽ മാസം ഒടുവിലും നിരവധി ചിത്രങ്ങൾ തീയറ്ററിൽ എത്തുന്നുണ്ട്.
ബസൂക്ക
മലയാള സിനിമയിൽ ഒരുകാലത്ത് ഹിറ്റ് കോംബോ ആയിരുന്നു മമ്മൂട്ടിയും തിരക്കഥാകൃത്ത് കലൂർ ഡെന്നീസും. കലൂർ ഡെന്നിസിന്റെ മകൻ മമ്മൂട്ടിയെ നായകനാക്കി സിനിമ സംവിധാനം ചെയ്യുന്നു എന്നതാണ് ബസൂക്കയുടെ പ്രത്യേകത. ചിത്രത്തിന്റെ തിരക്കഥയും ഡീനോ ഡെന്നിസിന്റേത് തന്നെ. ഗൗതം വാസുദേവ മേനോൻ, ബാബു ആൻ്റണി, നീത പിള്ള, ഷൈൻ ടോം ചാക്കോ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. ആരാധകർ ഏറെ പ്രതീക്ഷയോടെ കാത്തിരുന്ന ചിത്രം ഏപ്രിൽ 10 ന് തിയറ്ററുകളിലെത്തി.
ആലപ്പുഴ ജിംഖാന
ഖാലിദ് റഹ്‌മാന്റെ സംവിധാനത്തിൽ നസ്ലൻ നായകനാകുന്ന ആലപ്പുഴ ജിംഖാനയാണ് ഈ വിഷുവിന് തിയേറ്ററുകളിലെത്തുന്ന മറ്റൊരു ചിത്രം. തല്ലുമാലയ്ക്ക് ശേഷം ഖാലിദ് സംവിധാനം ചെയ്യുന്ന ചിത്രമാണ് ആലപ്പുഴ ജിംഖാന. ചിത്രത്തിന്റെ ട്രെയിലറും പാട്ടുകളും ഇതിനോടകം തന്നെ ആരാധകരുടെ ഹിറ്റ് ലിസ്റ്റിൽ ഉൾപ്പെട്ടുകഴിഞ്ഞു.
മരണമാസ്
മമ്മൂട്ടിയുടേയും നസ്ലന്റെയും ചിത്രങ്ങളോട് മാറ്റുരക്കാൻ മലയാളത്തിലെ ഹിറ്റ് മെഷിൻ എന്നറിയപ്പെടുന്ന ബേസിൽ ജോസഫിന്റെ മരണമാസ്' എന്ന ചിത്രവും വിഷുവിന് എത്തുന്നുണ്ട്. നവാഗതനായ ശിവപ്രപ്രസാദ് സംവിധാനം ചെയ്യുന്ന ചിത്രം നിർമ്മിച്ചത് നടൻ ടൊവിനോ തോമസ് ആണ്. നടൻ സിജു സണ്ണി കഥയെഴുതി സിജുവും ശിവപ്രസാദും ചേർന്നാണ് തിരക്കഥ തയ്യാറാക്കിയിരിക്കുന്നത്. ചിത്രത്തിൽ സുരേഷ് കൃഷ്ണ, രാജേഷ് മാധവൻ, സിജു സണ്ണി, പുളിയനം പൗലോസ്, ബാബു ആന്റണി, അനിഷ്‌മ അനിൽകുമാർ എന്നിവരും വേഷമിടുന്നു. ഏപ്രിൽ 10നു തന്നെ മരണമാസ്സ്‌ തിയേറ്ററുകളിൽ എത്തി.