ന്യൂഡൽഹി: ജൂൺ 4 ന് ഇന്ത്യ ബ്ലോക്ക് സർക്കാർ രൂപീകരിക്കാൻ പോകുന്നുവെന്നും ഇതിലൂടെ രാജ്യത്തിന് പുതിയ പ്രഭാതം കൊണ്ടുവരാൻ കഴിയുമെന്നും കോൺഗ്രസ് നേതാവ് രാഹുൽ ഗാന്ധി. ഏഴാമത്തെയും അവസാനത്തെയും വോട്ടെടുപ്പ് ദിനമാണ് ഇന്ന്. ഇതുവരെയുള്ള ട്രെൻഡുകൾ സൂചിപ്പിക്കുന്നത് രാജ്യത്ത് ഇന്ത്യ ബ്ലോക്ക് സർക്കാർ രൂപീകരിക്കുമെന്നാണെന്ന് രാഹുൽ ഗാന്ധി എക്സിൽ കുറിച്ചു.
കത്തുന്ന ചൂടിനെ വകവെക്കാതെ ജനാധിപത്യത്തെയും ഭരണഘടനയെയും സംരക്ഷിക്കാൻ വോട്ട് ചെയ്തവരെ അഭിനന്ദിക്കുന്നു. അഭിമാനം തോന്നുന്നു. അഹങ്കാരത്തിന്റെയും അടിച്ചമർത്തലിന്റേയും പ്രതീകമായി മാറിയ ഈ സർക്കാരിന് നിങ്ങളുടെ വോട്ടിലൂടെ അവസാന പ്രഹരം നൽകൂ എന്നും രാഹുൽ ഗാന്ധി കൂട്ടിച്ചേർത്തു.
ഇന്ത്യാ ബ്ലോക്ക് സർക്കാർ രൂപീകരിക്കുമെന്ന് കോൺഗ്രസ് നേതാവ് പ്രിയങ്ക ഗാന്ധിയും പറഞ്ഞു. അതുകൊണ്ട് അവസാന ഘട്ട വോട്ടെടുപ്പിൽ എല്ലാവരും വോട്ട് ചെയ്യണമെന്നും പ്രിയങ്ക അഭ്യർഥിച്ചു. നിങ്ങളുടെ അനുഭവം, നിങ്ങളുടെ ജ്ഞാനം, നിങ്ങളുടെ പ്രശ്നങ്ങൾ എന്നിവയെ അടിസ്ഥാനമാക്കി, ധാരാളം വോട്ട് ചെയ്യുക. നിങ്ങളുടെ ഭരണഘടനയ്ക്ക് വോട്ട് ചെയ്യുക, നിങ്ങളുടെ ജനാധിപത്യത്തിന് വോട്ട് ചെയ്യുക, നിങ്ങൾക്കായി മാത്രം പ്രവർത്തിക്കുന്ന ഒരു സർക്കാർ രൂപീകരിക്കുക എന്നാണ് പ്രിയങ്ക ഗാന്ധി വോട്ടർമാരോട് പറഞ്ഞത്.
കഴിഞ്ഞ മാസം 19 ന് ആരംഭിച്ച ലോക്സഭാ തെരഞ്ഞെടുപ്പിന്റെ ഏഴാം ഘട്ട വോട്ടെടുപ്പാണ് ഇന്ന്. ഏഴ് സംസ്ഥാനങ്ങളിലും കേന്ദ്രഭരണ പ്രദേശമായ ചണ്ഡീഗഡിലുമായി 57 പാർലമെന്റ് മണ്ഡലങ്ങളാണ് ഇന്ന് ജനവിധി തേടുന്നത്. 5.24 കോടി പുരുഷൻമാരും 4.82 കോടി സ്ത്രീകളും 3574 ഭിന്ന ലിംഗക്കാരും ഉൾപ്പെടെ 10.06 കോടിയിലധികം വോട്ടർമാരാണുള്ളതെന്നാണ് തെരഞ്ഞെടുപ്പ് കമ്മീഷന്റെ കണക്കുകൾ. പ്രധാനമന്ത്രി നരേന്ദ്ര മോദി, ഭാരതീയ ജനതാ പാർട്ടി (ബിജെപി) നേതാക്കളായ രവിശങ്കർ പ്രസാദ്, നിഷികാന്ത് ദുബെ, രവ്നീത് സിംഗ് ബിട്ടു, കോൺഗ്രസ് നേതാക്കളായ മനീഷ് തിവാരി, ചരൺജിത് സിംഗ് ചന്നി, ശിരോമണി അകാലിദൾ (എസ്എഡി) നേതാവ് ഹർസിമ്രത് എന്നിവരുൾപ്പെടെ 904 സ്ഥാനാർഥികളാണ് അവസാന ഘട്ട വോട്ടെടുപ്പിൽ മത്സരിക്കുന്നത്.
ലോക്സഭാ തിരഞ്ഞെടുപ്പിന്റെ നേരത്തെയുള്ള ആറ് ഘട്ടങ്ങളിലേക്കുള്ള വോട്ടെടുപ്പ് ഏപ്രിൽ 19, ഏപ്രിൽ 26, മെയ് 7, മെയ് 13, മെയ് 20, മെയ് 25 തീയതികളിലായിരുന്നു. ഒഡീഷയിൽ കഴിഞ്ഞ നാല് ഘട്ടങ്ങളിലായി ലോക്സഭയിലേക്കും നിയമസഭയിലേക്കും ഒരേസമാണ് തെരഞ്ഞെടുപ്പ് നടക്കുന്നത്.