ഹൈദരാബാദ് ജയിച്ചതോടെ 16 പോയിന്റുള്ള ഗുജറാത്തും ആര്സിബിക്കൊപ്പം പ്ലേ ഓഫിലെത്തുന്ന മൂന്നാമത്തെ ടീമായി. തോല്വിയോടെ ചെന്നൈ പ്ലേ ഓഫ് കാണാതെ പുറത്താകലിന്റെ വക്കിലാണ്. അവസാന മത്സരത്തില് ഗുജറാത്തിനെ തോല്പിച്ചാലും മറ്റ് ടീമുകളുടെ മത്സരഫലം കൂടി അനുകൂലമായാല് മാത്രമെ ചെന്നൈക്ക് പ്ലേ ഓഫ് സാധ്യതയുള്ളു. സ്കോര് ചെന്നൈ 20 ഓവറില് 180-7, ഹൈദരാബാദ് 19 ഓവറില് 181-5.
181 റണ്സ് വിജയലക്ഷ്യം പിന്തുടര്ന്ന ഹൈദരാബാദിന് ആശിച്ച തുടക്കമല്ല ലഭിച്ചത്. മൂന്നാം ഓവറില് തന്നെ ട്രാവിസ് ഹെഡിനെ(6) മടക്കിയ മുകേഷ് ചൗധരി ഹൈദരാബാദിന് ആദ്യ പ്രഹരമേല്പ്പിച്ചു. അഭിഷേക് ശര്മയെയും ഇഷാന് കിഷനെയും തകര്ത്തടിക്കാന് അനുവദിക്കാതിരുന്ന ചെന്നൈ ബൗളര്മാര് പവര് പ്ലേയില് ഹൈദരാബാദിനെ ഒരു വിക്കറ്റ് നഷ്ടത്തില് 45 റണ്സിലൊതുക്കി. പവര് പ്ലേയില് 14 പന്ത് നേരിട്ട അഭിഷേകിന് 18 റണ്സ് മാത്രമാണ് നേടാനായത്. ഇഷാന് കിഷനാകട്ടെ 16 പന്തില് 20 റണ്സ് മാത്രമാണ് നേടിയത്. പവര് പ്ലേക്ക് പിന്നാലെ നൂര് അഹമ്മദിനെ സിക്സ് പറത്തിയ അഭിഷേക് കത്തിക്കയറുമെന്ന് കരുതിയെങ്കിലും എട്ടാം ഓവറില് അക്കീല് ഹൊസൈന് മടക്കിയതോടെ ഹൈദരാബാദ് പതറി. 10 ഓവറില് രണ്ട് വിക്കറ്റ് നഷ്ടത്തില് 75 റണ്സാണ് ഹൈദരാബാദ് സ്കോര് ചെയ്തത്.