ചെന്നൈ: നോൺ എസി സ്ലീപ്പർ കോച്ച് യാത്രക്കാർക്കും ഇനി പുതപ്പും തലയിണകളും റെയിൽവെ നൽകും. യാത്രക്കാരുടെ സൗകര്യങ്ങൾ വർധിപ്പിക്കുന്നതിന്റെ ഭാഗമായാണ് പുതിയ നീക്കം. യാത്രക്കാർ ആവശ്യപ്പെടുന്ന മുറയ്ക്ക് ചെറിയ നിരക്ക് ഈടാക്കി ബെഡ് ഷീറ്റ്, തലയിണ എന്നിവ അനുവദിക്കുമെന്നാണ് ദക്ഷിണ റെയിൽവെ അറിയിച്ചിരിക്കുന്നത്.
നിലവിൽ, എയർ കണ്ടീഷൻ ചെയ്ത കോച്ചുകളിൽ യാത്ര ചെയ്യുന്നവർക്ക് മാത്രമാണ് ഇത്തരം സൗകര്യങ്ങൾ ലഭ്യമാകുന്നത്. ജനുവരി 1 മുതൽ ദക്ഷിണ റെയിൽവെയ്ക്ക് കീഴിലുള്ള 10 എക്‌സ്പ്രസ് ട്രെയിനുകളിൽ പദ്ധതി അവതരിപ്പിക്കും. ഒരു ബെഡ് ഷീറ്റ്, ഒരു തലയിണ, ഒരു തലയിണ കവർ എന്നിവയ്ക്ക് 50 രൂപയാണ് നിരക്ക് നിശ്ചയിച്ചിരിക്കുന്നത്. ഒരു ബെഡ് ഷീറ്റിന് മാത്രം 20 രൂപയും തലയിണ അതിന്റെ കവറിനൊപ്പം 30 രൂപയുമാണ് വില.
ആദ്യഘട്ടത്തിൽ ചെന്നൈ-മേട്ടുപ്പാളയം നീലഗിരി സൂപ്പർഫാസ്റ്റ് എക്‌സ്പ്രസ്, ചെന്നൈ-മംഗലാപുരം സൂപ്പർഫാസ്റ്റ് എക്‌സ്പ്രസ്, ചെന്നൈ എഗ്മോർ-മണ്ണാർഗുഡി എക്‌സ്പ്രസ്, ചെന്നൈ എഗ്മോർ-തിരുച്ചെന്തൂർ സൂപ്പർഫാസ്റ്റ് എക്‌സ്പ്രസ്, ചെന്നൈ-പാലക്കാട് എക്‌സ്പ്രസ്, എക്‌സ്പ്രസ്, ചെന്നൈ എഗ്മോർ-സെങ്കോട്ടൈ സിലമ്പു സൂപ്പർഫാസ്റ്റ് എക്‌സ്പ്രസ്, താംബരം-നാഗർകോവിൽ സൂപ്പർഫാസ്റ്റ് എക്‌സ്പ്രസ്, ചെന്നൈ-തിരുവനന്തപുരം സൂപ്പർഫാസ്റ്റ് എക്‌സ്പ്രസ്, ചെന്നൈ-ആലപ്പുഴ സൂപ്പർഫാസ്റ്റ് എക്‌സ്പ്രസ്, ചെന്നൈ എഗ്മോർ-മംഗലാപുരം എക്‌സ്പ്രസ് എന്നിവയിൽ ഈ സേവനം ലഭ്യമാക്കും.
പുതിയ നടപടി നോൺ എസി സ്ലീപ്പർ കോച്ചുകളിൽ മൺസൂൺ, ശൈത്യകാലങ്ങളിൽ യാത്ര ചെയ്യുന്നവർക്ക് വലിയ ആശ്വാസമാകുമെന്നാണ് വിലയിരുത്തൽ. 2023-24 ൽ ന്യൂ ഇന്നൊവേറ്റീവ് നോൺ-ഫെയർ റവന്യൂ ഐഡിയാസ് സ്‌കീമിന് കീഴിൽ ആണ് ഇത്തരം ഒരു ആശയം അവതരിപ്പിച്ചത്. ഇതിന്റെ പൈലറ്റ് പദ്ധതിക്ക് യാത്രക്കാരിൽ നിന്ന് മികച്ച പ്രതികരണം ലഭിച്ചിരുന്നു. പദ്ധതിയിലൂടെ മൂന്ന് വർഷത്തിനുള്ളിൽ ചെന്നൈ ഡിവിഷന് ഈ സേവനം 28.27 ലക്ഷം രൂപ അധിക വരുമാനം നൽകുമെന്നാണ് പ്രതീക്ഷ.