ആലപ്പുഴ: കൈനകരിയിൽ ഗർഭിണിയായ യുവതിയെ കൊന്നു കായലിൽ തള്ളിയ കേസിൽ രണ്ടാം പ്രതിയായ രജനിക്ക് വധശിക്ഷ. ആലപ്പുഴ ജില്ലാ സെഷൻസ് കോടതിയുടെതാണ് വിധി. നേരത്തെ കേസിൽ ഒന്നാം പ്രതിയായ പ്രബീഷിന് കോടതി വധശിക്ഷ വിധിച്ചിരുന്നു. പ്രതി രജനി മയക്കുമരുന്ന് കേസിൽ ഒഡീഷ ജയിലിൽ ആയതിനാൽ വിധി പറയൽ ഇന്നത്തേക്ക് മാറ്റുകയായിരുന്നു.
ഒന്നാം പ്രതിക്ക് ചുമത്തിയിട്ടുള്ള എല്ലാ വകുപ്പുകളും രണ്ടാം പ്രതിക്കും ചുമത്തിയിരുന്നു. രജനിക്ക് വധശിക്ഷ നൽകണമെന്ന പ്രോസിക്യൂഷൻ വാദം കോടതി അംഗീകരിക്കുകയായിരുന്നു. പുന്നപ്ര തെക്കേമഠം വീട്ടിൽ അനിത ശശിധരനെ കാമുകനും വനിതാ സുഹൃത്തും ചേർന്ന് കൊലപ്പെടുത്തി എന്നാണ് കേസ്. 2021 ജൂലൈ 10 നാണ് അനിതയുടെ മൃതശരീരം പൂക്കൈതയാറിൽ കണ്ടെത്തുന്നത്. വിവാഹിതനായ പ്രബീഷ് സുഹൃത്ത് രജനിയുമായും അനിതയുമായും അടുപ്പത്തിലായിരുന്നു.
ഇതിനിടെ അനിത ഗർഭിണിയായി. ബന്ധത്തിൽ നിന്നും പിരിയാൻ പ്രബീഷ് നിർബന്ധിച്ചെങ്കിലും അനിത തയ്യാറായില്ല. തുടർന്ന് പാലക്കാട് ജോലി ചെയ്യുകയായിരുന്ന അനിതയെ രജനിയുടെ വീട്ടിലേക്ക് വിളിച്ചു വരുത്തി. ഇവിടെ വെച്ച് കഴുത്തു ഞെരിച്ച് ശ്വാസം മുട്ടിച്ചു കൊലപ്പെടുത്തി എന്നതാണ് കേസ്.ശബ്ദം പുറത്തു വരാതിരിക്കാൻ രജനി സഹായിച്ചിരുന്നുവെന്നും പൊലീസ് കണ്ടെത്തി. തുടർന്ന് മൃതദേഹം പൂക്കൈതയാറിൽ ഉപേക്ഷിച്ച് പ്രതികൾ കടന്നു കളഞ്ഞു. രണ്ടാം പ്രതിയായ രജനി കേസിൽ ജാമ്യം നേടി പുറത്തിറങ്ങിയ ശേഷം, ലഹരിക്കേസിൽ പൊലീസിന്റെ പിടിയിലായിരുന്നു. എൻഡിപിഎസ് കേസിൽ ഒഡീഷയിലെ ജയിലിലായിരുന്നു രജനി.