ലണ്ടൻ: യുകെയിൽ ഇന്ത്യൻ വംശജയായ 20 കാരിയെ വംശീയമായി അധിക്ഷേപിക്കുകയും ബലാത്സംഗത്തിന് ഇരയാക്കുകയും ചെയ്തതായി ആരോപണം. വെസ്റ്റ്മിഡ്ലാൻഡിലാണ് സംഭവം. യുവതിക്കെതിരെ ഭയാനകമായ ആക്രമണമാണ് നടന്നതെന്നും പ്രതിയെ അറസ്റ്റ് ചെയ്യാനുള്ള നീക്കങ്ങളെല്ലാം നടക്കുന്നുണ്ടെന്നും അന്വേഷണത്തിന് മേൽനോട്ടം വഹിക്കുന്ന മുതിർന്ന പൊലീസ് ഓഫീസർ റോണൻ ടൈറർ പറഞ്ഞു. വാൽസലിലെ പാർക്ക് ഹാൾ എന്ന പ്രദേശത്ത് ഒരു സ്ത്രീ നടുറോഡിൽ കിടക്കുന്നതായാണ് പൊലീസിന് വിവരം ലഭിച്ചത്. ഇതോടെയാണ് സംഭവം പുറത്തു വന്നത്.
സിസിടിവിയിൽ പതിഞ്ഞ പ്രതിയുടെ ചിത്രം പൊലീസ് പുറത്തുവിട്ടിട്ടുണ്ട്. പ്രതിയെ കണ്ടെത്താൻ സഹായിക്കണമെന്ന് പ്രദേശവാസികളോട് പൊലീസ് ആവശ്യപ്പെട്ടിട്ടുണ്ട്. പ്രതിയെ എത്രയും വേഗം കസ്റ്റഡിയിലെടുക്കാൻ കഴിയുന്ന തരത്തിൽ തെളിവുകൾ ശേഖരിക്കുന്നുണ്ട്. പല തരത്തിലുള്ള അന്വേഷണങ്ങൾ നടക്കുന്നുണ്ട്. പ്രദേശത്ത് സംശയകരമായി പെരുമാറിയ ആരെയെങ്കിലും കണ്ടിട്ടുണ്ടോ എന്ന് അറിയേണ്ടത് അത്യാവശ്യമാണെന്നും അന്വേഷണ ഉദ്യോഗസ്ഥൻ കൂട്ടിച്ചേർത്തു.
ആ പ്രദേശത്തുകൂടി വാഹനമോടിക്കുമ്പോൾ ആരെങ്കിലും എന്തെങ്കിലും ഷൂട്ട് ചെയ്യുകയോ ഡാഷ് ക്യാം ദൃശ്യങ്ങൾ ഉണ്ടെങ്കിലോ അത് ഞങ്ങൾക്ക് ഷെയർ ചെയ്യുക. വിവരങ്ങളോ ദൃശ്യങ്ങളോ സുപ്രധാന വഴിത്തിരിവായേക്കാമെന്നും അന്വേഷണ ഉദ്യോഗസ്ഥൻ കൂട്ടിച്ചേർത്തു. കോവെൻട്രി സൗത്തിൽ നിന്നുള്ള എംപി സാറാ സുൽത്താന സംഭവത്തിൽ അപലപിച്ചുകൊണ്ട് എക്സിൽ എഴുതി. വാൽസാലിൽ നടന്ന വംശീയ ആക്രമണത്തിൽ പഞ്ചാബിയായ ഒരു സ്ത്രീ ബലാത്സംഗം ചെയ്യപ്പെട്ടു. കഴിഞ്ഞമാസം ഓൾഡ്ബറിയിൽ നടന്ന വംശീയ ആക്രമണത്തിൽ ഒരു സിഖ് സ്ത്രീ ബലാത്സംഗം ചെയ്യപ്പെട്ടു. ഇത്തരം ആക്രമണങ്ങൾ ഫാസിസവും വിദ്വേഷവും ആണ് കാണിക്കുന്നത്. ഈ ഭീഷണി എത്രത്തോളം ഭയാനകവുമാണെന്ന് എനിക്കറിയാം. സമത്വം, നീതി, ഐക്യം എന്നിവയിൽ കെട്ടിപ്പടുക്കുന്ന ഒരു സോഷ്യലിസ്റ്റ് സമൂഹത്തിനായി പോരാടുകയാണ് വേണ്ടതെന്നും സാറാ സുൽത്താന പറയുന്നു.