കണ്ണൂർ: വിചാരണയ്ക്കിടെ പ്രതികളുടെ ഫോട്ടോയെടുത്ത സിപിഎം വനിതാ നേതാവിനെതിരെ നടപടിയുമായി കോടതി. തളിപ്പറമ്പ് അഡീഷണൽ ജില്ലാ സെഷൻസ് കോടതിയിൽ ധനരാജ് വധക്കേസിലെ വിചാരണ നടക്കുന്നതിനിടെയാണ് സംഭവം. പ്രതികളുടെ ഫോട്ടോ എടുത്ത പയ്യന്നൂർ നഗരസഭ മുൻ വൈസ് ചെയർപേഴ്സൺ കെപി ജ്യോതിയോടാണ് കോടതി സമയംതീരുംവരെ നിൽക്കാൻ നിർദേശിച്ചത്. അധികാരത്തിന്റെ ധാർഷ്ട്യം കാണിക്കരുതെന്നും കോടതി ചൂണ്ടിക്കാട്ടി.
കോടതി നടപടി മൊബൈലിൽ പകർത്തുന്നത് ജഡ്ജ് കാണുകയായിരുന്നു. ജ്യോതിക്ക് ആയിരം രൂപ കോടതി പിഴയിടുകയും ചെയ്തു. മാപ്പപേക്ഷ എഴുതി നൽകിയ ജ്യോതിയെ നടപടികൾ തീരും വരെ കോടതി മുറിയിൽ നിർത്തുകയും ചെയ്തു.
ധനരാജ് വധക്കേസിലെ കേസിലെ രണ്ടാംഘട്ട വിചാരണയാണ് തളിപ്പറമ്പ് അഡീഷണൽ ജില്ലാ സെഷൻസ് കോടതിയിൽ തുടരുന്നത്. 2016 ജൂലൈ 11നാണ് പയ്യന്നൂരിലെ സിപിഎം പ്രവർത്തകനായ സിവി ധനരാജിനെ വെട്ടിക്കൊലപ്പെടുത്തിയത്. 20 പ്രതികളാണ് കേസിലുള്ളത്. ബിജെപി, ആർഎസ്എസ് പ്രവർത്തകരാണ് പ്രതികൾ.