കൊച്ചി: സിന്തറ്റിക് മയക്കുമരുന്നുകളുമായി യുവഡോക്ടർ പിടിയിൽ. പറവൂർ വടക്കേക്കര സ്വദേശി അംജദ് അഹ്സാൻ (31) ആണ് പിടിയിലായത്. ഇയാളിൽ നിന്ന് 0.83 ഗ്രാം എംഡിഎംഎ പിടിച്ചെടുത്തയായി കൊച്ചി സിറ്റി ഡാൻസാഫ് സ്ക്വാഡ് അറിയിച്ചു.
ലഹരിമരുന്ന് ഉപയോഗിക്കുന്ന അംജദ് ഒരു മാസത്തിലേറെയായി പൊലീസ് നിരീക്ഷണത്തിലായിരുന്നു. മയക്കുമരുന്നു കൈമാറുന്നതിനിടെ ശ്രമിക്കുന്നതിനിടെ പുല്ലേപ്പടിയിൽ വെച്ചാണ് ഇയാളെ പിടികൂടിയത്. സിറ്റി പൊലീസ് കമ്മീഷണർ പുട്ട വിമലാദിത്യയ്ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. നാർക്കോട്ടിക് എസിപി കെ എ അബ്ദുൾ സലാമിന്റെ നേതൃത്വത്തിലുള്ള പ്രത്യേക സംഘമാണ് ഇയാളെ അറസ്റ്റ് നടത്തിയത്.
ഒരു ഗ്രാമിൽ താഴെ മാത്രമുള്ള ലഹരിമരുന്ന് കണ്ടെത്തിയതിനാൽ എൻഡിപിഎസ് ആക്ട് പ്രകാരം സ്റ്റേഷൻ ജാമ്യം ലഭിക്കും. എന്നാൽ പ്രതി ഒരു മെഡിക്കൽ പ്രൊഫഷണലായതിനാൽ കേസിന്റെ ഗൗരവം കണക്കിലെടുത്ത് പ്രതിയെ കോടതിയിൽ ഹാജരാക്കുമെന്നും എറണാകുളം നോർത്ത് പൊലീസ് പറഞ്ഞു. ചില ഡോക്ടർമാരുടെയും ആശുപത്രി ജീവനക്കാരുടെയും ഇടയിൽ മയക്കുമരുന്ന് ഉപയോഗിക്കുന്നതായി വിവരമുണ്ടെന്നും എന്നാൽ തിരക്കേറിയ ആരോഗ്യ കേന്ദ്രങ്ങളിൽ ഇത്തരം മയക്കുമരുന്ന് ശൃംഖലകൾ പ്രവർത്തിക്കുന്നത് കണ്ടെത്തുക വെല്ലുവിളി നിറഞ്ഞതാണെന്നും പൊലീസ് പറഞ്ഞു.